Şəki şəhər İcra Hakimiyyətindən zəlzələ ilə bağlı

Şəkidə baş verən zəlzələ ilə bağlı şəhər ərazisində heç bir dağıntı qeydə alınmayıb.

Bu barədə Ölkə.Az-a Şəki şəhər İcra Hakimiyyətindən bildiriblər.

Məlumata görə, yalnız zəlzələnin episentrinə yaxın yerləşən Turan qəsəbəsində bəzi evlərə baxış keçirilir.

“Zəlzələ ilə bağlı yaradılmış komissiya üzvləri artıq ərazidədir. İlkin məlumata görə, qəsəbə ərazisində bəzi evlərdə çatlar yaranıb. Hazırda araşdırma davam edir”.

İcra Hakimiyyətindən həmçinin bildiriblər ki, zəlzələ ilə bağlı hələlik heç kim şəhər xəstəxanası və kənd tibb məntəqələrinə müraciət etməyib.

Bundan başqa, Şəki şəhər İcra Hakimiyyətindən zəlzələ nəticəsində qurumun inzibati binasında çatlar yaranması barədə yayılan xəbərləri təkzib ediblər.

Bildirilib ki, Şəkinin İcra Hakimiyyətinin binasında heç bir çat yaranmayıb, sadəcə bəzi yerlərdə binanın üzərinə vurulmuş suvaq qatı divardan aralanıb.

Qeyd edək ki, Şəki Seysmoloji İdarəsindən verilən məlumata görə, şəhər ərazisində zəlzələnin gücü 5 bal təşkil edib.

Ölkə.Az