Heydərov məktəbli geyimlərini də monopoliya altına aldı

Ölkədə cibinə girmədiyi vətəndaş qalmayacaq...

"Bütün Azərbaycanın inhisarlaşdırılması" prossesi uğurla davam etdirilir.

Dünən yayılan bir məlumatda Azərbaycanda məktəbli formalarının tikilməsinin ölkənin ən iri şirkətlərindən birinə həvalə edildiyi bildirildi.

Adı çkilən şirkət artıq Azərbaycanı öz monopoliyasına almış "Gilan Holdinq" şirkətidir. Bundan sonra məktəbli formalarını Kəmaləddin Heydərova aid olan bu holdinqin "Gilan Tekstil" adlı müəssisəsi tikəcək.

Xatırladırıq ki, "Gilan Holdinq" Sumqayıt texnika parkı adlanan sənaye zonasında sovet dövründən qalan iri müəssisələri tərkibinə qataraq böyük bir tekstil firması yartmışdı. Çin, Türkiyə və digər tekstil istehsalçısı ölkələrin şirkətləri ilə sağlam rəqabət apara bilməyən "Gilan tekstil" bu dəfə də böyüməyin və qazanmağın ənənəvi, azərbaycansayağı yoluna baş vudu.

Hazırlanması əvvəllər Türkiyənin "Bossa" tekstil şirkətinə həvalə edilmiş məktəbli geyimləri valideyinlərə kifayət qədər ucuz başa gəlirdi. Geyimin keyfiyyətinin lap əla olmasa da, normal olduğu düşünülürdü. İndi isə "Gilan tekstilin" geyimləri hansı növ parçadan tikəcəyi və neçəyə satacağı vətəndaşları düşündürməyə başlayıb. Məktəblərdə dərslərin başlanmasına çox qısa bir müddət qalmasına baxmayaraq bu qərarın gec qəbul olunması mütləq problemlərin yaranmasına gətirib çıxaracaq. Bir ay ərzində milyonlarla dəst paltarın hazırlanması o qədər də asan iş deyil. Məlumata görə, "Gilan tekstil" geyimləri tikmək üçün Çin firmalarından birinə külli miqdarda sintetik parça sifarişi verib. Təmiz sintetikanın insan sağlamlığına vurduğu zərəri nəzərə alsaq, həm də bu paltarları geyinənlərin azyaşlı uşaqlar olduğunu düşünsək, gələcək nəslin indidən şikəst olacağını əminiklə demək olar.

Məsələnin ilginc tərəfi isə ərzaq və yeyinti məhsullarından tutmuş tikinti materiallarına qədər bir çox əmtəə nişanını öz əlində cəmləşdirən "Gilan Holdinq"in bu sahəni də öz nəzarətinə almasıdır. Axı ölkədə minlərlə insan ailəsinin çörək pulunu dərziliklə qazanır. Statndart formanın verildiyi paltarın hər kəsin harda istəyir tikdirməsi yalnız vətəndaşa və orta biznesə xeyir verə bilərdi. Orta biznesin inkişafı isə iqtisadiyyatın möhkəm təməllər üzərində durması deməkdir. Amma təəssüf ki, Heydərov kimi əlində məmur rıçaqları cəmləşdirmiş oliqarxlar Azərbaycanda orta biznesin formalaşmasının qarşısını bütün vasitələrlə alırlar.

Ölkə.az