Azərbaycanda Mamed və Məmməd adları qadağan olunub? - FOTO
Ölkə.Az-ın araşdırması nəticəsində məlum oldu ki, sözügedən açıqlama 8 il əvvələ aiddir.
Bu açıqlamanın hansı səbəbdən yenidən gündəmə gəlməsi isə məlum deyil.
Nazirlər Kabineti yanında Terminologiya Komissiyasının sədr müavini Sayalı Sadıqovanın sözügedən açıqlaması 8 il əvvələ aid olsa da, ötən dövr ərzində sözügedən adların hər ikisi uşaqlara verilib.
Belə ki, Ədliyyə Nazirliyinin adlar üzrə statistikasına görə, Mamed adı 2019-2022-ci ildə 12 nəfərə, Məmməd adı isə 2019-2023-cü illərdə 163 nəfərə verilib. təkcə bu il ərzində doğulan uşaqlardan 21-i Məmməd adını alıb.
S.Sadıqova bu gün "Report"a verdiyi açıqlamada bu adlarla bağlı heç bir qadağanın olmadığını deyib:
“Məmməd”, “Mamed” adları ilə bağlı Nazirlər Kabineti yanında Terminologiya Komissiyasında heç bir müzakirə aparılmayıb, yaxın vaxtlarda heç bir media subyekti və jurnalistə hansısa açıqlama verilməyib. Ümumiyyətlə, Məmməd adının qoyulması qadağan deyil".
S.Sadıqova vurğulayıb ki, 2015-ci ildə “Məmməd”, “Məhəmməd”, “Mamed”, “Muhammed” adlarının hansının yazılışının düzgün hesab olunması mövzusu müzakirə olunub və bu zaman onların “Məmməd” və “Məhəmməd” kimi iki formada yazılışı tövsiyə edilib:
“Bizim işimiz ad qadağası qoymaq deyil, insanları bu cür çaşdırmaq olmaz”.
Qeyd edək ki, S.Sadıqova 2015-ci ilə verdiyi açıqlamada hər iki adla bağlı bu sözləri deyib:
“Təsəvvür edin ki, bir ailədə həm Mamed, həm Məmməd, həm də Məhəmməd adında uşaq var. Əslində, Mamed və Məmməd adlarının kökü elə Məhəmməddir.
"ASAN xidmət" mərkəzlərindən də bizə tez-tez müraciət edirdilər ki, Mamed adının düzgün yazılış qaydasını bilmirik. Artıq bununla bağlı qərar qəbul olunub və vahid ad kimi Məhəmməd seçilib”.
Billurə Yunus
