Vaqif Əsədov: "Bizə kömək edin"

Yol hərəkəti qaydalarının pozulmasına daima rast gəlirik

Sürücülərin bir-birinə yol verməməsini, sürücü mədəniyyətinin aşağı səviyyədə olmasını hər kəs bilir, bunu anlamağa da çalışmaq olar. Ancaq hərəkət üstünlüyünə malik olan yanğınsöndürən, təcili tibbi yardım maşınına yol verməməyi anlamaq imkansızdır. O maşınların hərəkəti insan taleyini, həyatını həll edir. Yaxın zamanda Azadlıq prospektində yanan binaya yanğınsöndürənlərin hadisə yerinə gec çatması nələrə səbəb olduğunu hər kəs bilir. Dəfələrlə təcili tibbi yardım maşınının tıxacda qalması insan həyatının sonu ilə nəticələnib.

Bu sahədə təbliğatın aparılması heç şübhəsiz vacibdir.

Bununla bağlı Bakı Şəhər Dövlət Yol Polisi İdarəsinin İctimaiyyətlə Əlaqələr şöbəsinin rəisi Vaqif Əsədov Ölkə.Az-a açıqlama verib:

"Hərəkət üstünlüyünə malik olan nəqliyyat vasitələri var. Bu nəqliyyat vasitələrinə yanğınsöndürənlər, təcili tibbi yardım maşınları, polis maşınları və.s. aiddir. Bu avtomobillər yol hərəkəti üstünlüyünə malik olan avtomobillərdir. İstənilən halda bu avtomobilləri idarə edən sürücülər həmin avtomobildə olan üstünlük işarələrindən istifadə etdiyi zaman digər hərəkət iştirakçıları onların sərbəst, rahat və fasiləsiz hərəkətinə şərait yaratmalıdır. Qanunda budur. Ancaq bu qanunu pozan sürücülərimiz də az deyil.

Bu sahədə təbliğat aparmaq lazımdır. Təkcə Vaqif Əsədovla, "Polis" qəzeti ilə, "Siqnal" verilişi ilə təbliğatın aparılması mümkün deyil. Mediamız bu təbliğatda bizim yanımızdadır və sona qədər yanımızda olmasını istəyirik. Hərəkət üstünlüyünə malik olan avtomobillərə təkcə qanunda yazıldığına görə yox, insanlıq naminə yol vermək lazımdır."

Səxavət Məmməd
Ölkə.Az