Həftənin icmalı
Gürcüstana səfər etmiş azərbaycanlıların sayı milyona çatır
11.09.2015
2015-ci ilin yanvar-avqust ayı üçün Gürcüstana səfər edən xaricilərin sayı, keçən ilin analoji dövrü üçün olan göstəricilər ilə müqayisədə 5,9% artaraq 3 milyon 922,4 min nəfərdən ibarət olub, Gürcüstanın turizm üzrə Milli administrasiyası bildirib.
Gürcüstana səfər edən xaricilər arasında birinci yeri Ermənistan tutur – 944 min 029 nəfər (keçən ilin analoji dövrü ilə müqayisədə 14% çoxdur).
İkinci yerdə Azərbaycandır – 932 min 054 turist (keçən ilin analoji dövrü ilə müqayisədə 8% çoxdur).
Beynəlxalq turistlərin sayına görə, üçüncü yerdə Türkiyədir – 926 min 755 nəfər, bu, 2014-cü ilin analoji dövrü üçün olan göstəricidən 6% çoxdur.
Ziya Məmmədov Zərdabda vətəndaşları qəbul edəcək
11.09.2015
Vətəndaşların qəbulu və müraciətlərinə baxılması, mövcud nəqliyyat problemlərinin araşdırılması və həll edilməsi məqsədi ilə nəqliyyat naziri Ziya Məmmədov sentyabrın 18-də Zərdab şəhərində Kürdəmir, Hacıqabul və Zərdab rayonlarında yaşayan vətəndaşları qəbul edəcək.
Ölkə.Az Nəqliyyat Nazirliyinin məlumatına istinadla xəbər verir ki, vətəndaşların qeydiyyatı sentyabrın 16-da saat 09:00-dan 18:00-dək müvafiq olaraq aşağıdakı ünvanlarda aparılacaq:
- Zərdab “13 saylı Yol İstismarı İdarəsi” (Zərdab rayonu, Əlvənd magistral yolunun 3-cü km)
- Kürdəmir “14 saylı Yol İstismarı İdarəsi” (Kürdəmir şəhəri, M.P.Vaqif küçəsi-13)
- Hacıqabul “15 saylı Yol İstismarı İdarəsi” (Hacıqabul rayonu, Babək küçəsi, 28)
Elçin Quliyev Alper Coşkun ilə görüşdü
11.09.2015
Dövlət Sərhəd Xidmətinin (DSX) rəisi - Sərhəd Qoşunlarının Komandanı, general-polkovnik Elçin Quliyev bu gün Türkiyənin Azərbaycandakı fövqəladə və səlahiyyətli səfiri Alper Coşkunu qəbul edib.
Xidmətin mətbuat mərkəzindən Ölkə.Az-a verilən məlumata görə, görüşdə Alper Coşkun ölkəsinin Azərbaycanda yeni təyin olunmuş hərbi attaşesi, general-mayor İhsan Başbozkurtu təqdim edib.
DSX rəisi hərbi attaşeni yeni təyinatı ilə əlaqədar təbrik edib və Türkiyə Silahlı Qüvvələri ilə Azərbaycan Respublikasının Dövlət Sərhəd Xidməti arasında əməkdaşlığın genişləndirilməsi istiqamətində gələcək fəaliyyətində ona uğurlar arzulayıb.
Milli Məclisdə Avropa Parlamentinin qətnaməsi pislənildi
11.09.2015
Avropa Parlamentinin Azərbaycan haqqında qəbul etdiyi qərəzli qətnamə Milli Məclisin Aqrar siyasət komitəsinin bu gün keçirilən iclasında pislənilib və qətnamənin qərəzli olduğu, heç bir reallığa söykənmədiyi bildirilib.
İclasda çıxış edən komitə üzvü Fəzail İbrahimli bildirib ki, Avropa Parlamentinin qəbul etdiyi qətnamə Azərbaycana qarşı qərəzli mövqenin növbəti nümunəsidir: “Avropanın arzuları həmişə ürəyində qalıb. Dəfələrlə Azərbaycana qarşı qərəzli mövqe nümayiş etdirən Avropa bu istəyinə nail ola bilməyib. Azərbaycan parlament seçkiləri ərəfəsindədir. Avropanın bu mövqeyi parlament seçkilərinin boykotuna hesablanmış bir addımdır. Bütün addımlarda hiss edirik ki, Avropa parlamentariləri Azərbaycana münasibətdə yanlış bir mövqe seçiblər. Bunu təkcə Azərbaycana deyil, Türkiyəyə qarşı münasibətdə də görürük. Olmayan bir soyqırımı gündəmə gətirib Türkiyəyə qarşı hər hansı bir təzyiq vasitəsi kimi bundan istifadə edirlər. Avropa niyə Xocalı faciəsini gündəmə gətirmir? Bu faciəni törədənləri niyə cəzalandırmır? Bütün dünya bilir ki, Azərbaycanın 20 faiz torpağı işğal edilib, amma Ermənistanı işğalçı dövlət kimi tanımır”.
İbrahim Məmmədov AzTV-dən çıxarıldı
11.09.2015
Azərbaycan Televiziya və Radio Verilişləri Qapalı Səhmdar Cəmiyyətinin sədri, millət vəkili Arif Alışanov Televiziyada sədr müavini vəzifəsində çalışan İbrahim Məmmədovu bu gün işdən çıxarıb.
Bu haqda məlumat AzTV-dən verilib.
Məlumatı dəqiqləşdirmək üçün AzTV sədrinin köməkçisi Fərman Orucovla əlaqə saxladıq. O, İbrahim Məmmədovun rəsmən işdən çıxarılması xəbərini təsdiq etmədi: "Sədr müavininin işdən uzaqlaşdırılması haqda mütləq ölkə başçısının sərəncamı olmalıdır. Hələlik isə belə sərəncam yoxdur".
Qeyd edək ki, İbrahim Məmmədov əvvəllər "Azadlıq" qəzetində, "Space" və ANS telekanallarında çalışıb.
Qurbanlıq heyvanların kəsilməsinə nəzarət ediləcək — ƏMR
11.09.2015
Sentyabrın 24-25-də qeyd olunacaq Qurban bayramı ilə əlaqədar görüləcək tədbirlər haqqında Kənd Təsərrüfatı Nazirliyi yanında Dövlət Baytarlıq Nəzarəti Xidməti əmr imzalayıb.
Bu barədə Ölkə.Az-a xidmətdən məlumat verilib.
Əmr Bakı şəhərinə gətirilən qurbanlıq heyvanların baytarlıq-sanitariya tələblərinə cavab verməyən və ticarət üçün xüsusi ayrılmış yerlərdən kənarda kəsilməsinin qarşısını almaq məqsədi ilə verilib.
İmzalanmış əmrdə Qurban bayramı ilə əlaqədar olaraq Bakı şəhərinə gətirilən heyvanların sağlam olması, həmçinin baş verə biləcək təhlükəli xəstəliklərin qarşısını almaq, ətin və digər məhsulların qanunvericiliklə müəyyən edilmiş qaydada baytarlıq-sanitariya ekspertizasının aparılmasına dövlət baytarlıq nəzarətinin gücləndirilməsi məqsədi ilə baytarlıq mütəxəssislərinin heyvanların kütləvi halda kəsildikləri Bakı şəhərinin ayrı-ayrı rayonlarına təhkim olunması qeyd edilir.
"Dialoq Avrasiya"nın yeni rəhbəri "Ölkə.Az"da
11.09.2015
Qonaq "Ölkə.Az"la əməkdaşlıq edəcəklərini vurğulayıb
Ölkə.Az xəbər verir ki, "Dialoq Avrasiya" təşkilatının Azərbaycan üzrə nümayəndəliyinin yeni rəhbəri Cəlil Ərdəm "Ölkə.Az" informasiya portalının qonağı olub.
Cəlil Ərdəm redaksiyanın rəhbərliyi ilə görüşərək gələcək fəaliyyəti barədə geniş məlumat verib. Azərbaycan-Türkiyə münasibətlərindən danışan Cəlil Ərdəm bunun daha da inkişaf etdirilməsi üçün fəaliyyət göstərəcəyini və yeni layihələrin həyata keçiriləcəyini bildirib.
Bu vaxta qədər təşkilatın Azərbaycanda qeyd olunan istiqamət üzrə görülən işləri xatırladan qonaq məqsədlərinə nail olmaq üçün "Ölkə.Az"la əməkdaşlıq edəcəklərini vurğulayıb.
Ordumuz düşmən mövqelərinə 183 atəş zərbəsi endirdi
11.09.2015
Erməni silahlı bölmələri cəbhənin müxtəlif istiqamətlərində 60 və 82 millimetrlik minaatanlardan, həmçinin iriçaplı pulemyotlardan da istifadə etməklə sutka ərzində atəşkəs rejimini ümumilikdə 133 dəfə pozub.
Müdafiə Nazirliyinin mətbuat xidmətindən Ölkə.Az-a verilən məlumata görə, Ermənistanın Noyemberyan rayonunun Barekamavan kəndində yerləşən mövqelərdən Qazax rayonunun Qaymaqlı kəndində yerləşən mövqelərimiz atəşə tutulub.
Bundan başqa, Ermənistanın işğalı altında olan Goranboy rayonunun Talış, Tapqaraqoyunlu, Gülüstan, Tərtər rayonunun Göyarx, Ağdam rayonunun Sarıcalı, Kəngərli, Şıxlar, Mərzili, Cəvahirli, Novruzlu, Şuraabad, Qaraqaşlı, Yusifcanlı, Xocavənd rayonunun Kuropatkino, Füzuli rayonunun Horadiz, Qaraxanbəyli, Aşağı Əbdürrəhmanlı, Aşağı Seyidəhmədli, Qorqan, Cəbrayıl rayonunun Mehdili kəndləri yaxınlığında, həmçinin Göygöl, Goranboy, Xocavənd, Füzuli və Cəbrayıl rayonları ərazisindəki adsız yüksəkliklərdə yerləşən mövqelərdən də Silahlı Qüvvələrimizin mövqeləri atəşə tutulub.
Ordumuzun qırıcıları erməniləri geri oturtdu
10.09.2015
Müdafiə Nazirliyinin keçirdiyi komanda qərargah hərbi təlimləri davam edir. Azərbaycan Silahli Qüvvələri bir müddətdir ki, hərbi təlimlərə start verib. Hətta 6 mindən artıq ehtiyyatda olan hərbi vəzifəli Müdafiə Nazirliyinin təlimlərinə cəlb olunub. Zirehli döyüş texnikası təlim rayonlarına çatdırılıb. Təbii ki, bütün bu baş verənlərə Ermənistan tərəfi sakit yanaşa bilmədi. Silahlı qüvvələrimizin təlimləri zamanı təxribata əl atdılar.
Azərbaycan Silahlı Qüvvələrinin genişmiqyaslı hərbi təlimləri zamanı Ermənistan tərəfi təxribata əl atıb. Təşvişə düşən qarşı tərəf səmaya təyyarələrini qaldırıb və sərhədlərimizə doğru istiqamətləndiriliblər.
Lakin Azərbaycanın Hava Hücumundan Müdafiə Qüvvələri bu faktı dərhal qeydə alıb. Hərbi hava qüvvələrimizin sayəsində Ermənistan təyyarələrini öz mövqelərinə geri qayıtmağa məcbur edilib.
Azərbaycanda uşaq ölümü halları azalıb
10.09.2015
2015-ci ildə Azərbaycanda 1990-cı illə müqayisədə 5 yaşdan aşağı olan uşaqlar arasında ölüm halları azalıb.
Bu barədə BMT-nin Uşaq fondu (YUNİSEF) və Ümumdünya Səhiyyə Təşkilatının illik hesabatnda deyilir.
Hesabatda qeyd olunub ki, Azərbaycanda ölüm halları hər 1000 doğuşa 105 nəfərdən 52 nəfərə düşüb.
Hesabata əsasən, son 25 ildə üşaq ölümü 25 dəfə azalıb. Belə ki, 2015-ci ildə təqribən 5,9 milyon uşaq 5 yaşına çatmamış dünyasını dəyişib. 1990-cı ildə isə ölümlərin sayı 12,7 milyon olub.
Bakıdan Gəncəyə ikimərtəbəli qatarlar işləyəcək
10.09.2015
Yaxın gələcəkdə Gəncə istiqamətində dəmir yolunda sərnişindaşımada ikimərtəbəli qatarlardan istifadə olunacaq.
Ölkə.Az-ın məlumatıan görə, bunu Trend-ə açıqlamasında "Azərbaycan Dəmir Yollları" QSC-nin mətbuat xidmətinin rəhbəri Nadir Əzməmmədov deyib.
Onun sözlərinə görə, hazırda bununla bağlı layihə hazırlanır:
“Yeni icra olunacaq layihələr çərçivəsində iki mərtəbəli qatarların Gəncə istiqamətində dəmir yolunda sərnişindaşımada xəttə buraxılması da var. Amma bu məsələyə Bakı-Sumqayıt qatar xətti işə salınandan sonra baxılacaq. Hazırda diqqət Bakı-Sumqayıt qatar xəttinin işə salınmasına yönəlib. Məqsədimiz odur ki, yeni tədris ilindən etibarən bu iş yekunlaşsın və insanlar mənzil başına daha rahat çata bilsinlər”.
Azərbaycan “France 2” telekanalına qarşı iddia qaldırır
10.09.2015
Proqram ərzində Azərbaycana qarşı qərəzli mövqe nümayiş etdirilib
Ölkə.Az xəbər verir ki, Azərbaycan sentyabrın 7-də Fransanın "France 2" telekanalında yayımlanan "Cash Investigation" verilişinin nümayişindən sonra bu telekanala qarşı iddia qaldırmaq niyyətindədir.
Bu barədə məlumatı "France-Presse" agentliyi yayıb.
Azərbaycan adından çıxış edən fransız vəkil Olivye Pardo bildirib ki, Eliz Lyüse və Loran Rişar adlı jurnalistlər veriliş boyu Azərbaycanın ünvanına əsassız itihamlar irəli sürüblər. Vəkil əlavə edib ki, Azərbaycan bu məsələyə dözmək niyyətində deyil və telekanalı məhkəməyə verəcək.
Xatırladaq ki, sentyabrın 7-də "France 2" telekanalında "Cash Investigation" həftəlik araşdırma proqramı çərçivəsində Azərbaycanla bağlı sujet yayımlanmışdı.
Səfərbərlik Xidməti: Çağırışa gəlməyənləri cəza gözləyir
10.09.2015
Hərbi vəzifəli dedikdə ehtiyata keçirilmiş Azərbaycan Respublikasının vətəndaşları nəzərdə tutulur. Hərbi vəzifəlilər ehtiyatda olduqları dövrdə hərbi təlim, hərbi yoxlama və xüsusi toplanışlara çağırılırlar.
Səfərbərlik hazırlığının yoxlanılması məqsədilə hərbi vəzifəlilər həm də hərbi yoxlama toplanışlarına çağırılırlar. Səfərbərlik hazırlığı və səfərbərliklə əlaqədar üzərinə düşən vəzifələri yerinə yetirməyən vətəndaşlar Azərbaycan Respublikasının qanunvericiliyi ilə nəzərdə tutulmuş qaydada məsuliyyət daşıyırlar.
Ehtiyatda olan hərbi vəzifəlilər hər an səfərbərlik hazırlığının yoxlanılması məqsədilə hərbi təlim toplanışlarına çağırılmağa hazır olmalıdırlar. Əsas məqsəd tələb olunan zaman çərçivəsində bu resursu yığmaqdır.
Ordumuz düşmənə 140 atəş zərbəsi endirdi
10.09.2015
Erməni silahlı bölmələri cəbhənin müxtəlif istiqamətlərində 60 millimetrlik minaatanlardan və iriçaplı pulemyotlardan da istifadə etməklə sutka ərzində atəşkəs rejimini ümumilikdə 80 dəfə pozub.
Ölkə.Az Müdafiə Nazirliyinin məlumatına istinadla xəbər verir ki, Ermənistan Respublikası Noyemberyan rayonunun Dovex, Voskevan kəndlərində yerləşən mövqelərdən Qazax rayonunun Kəmərli, Quşçu Ayrım kəndlərində, Berd rayonunun Çinari kəndində yerləşən mövqelərdən Tovuz rayonunun Koxanəbi kəndində, Krasnoselsk rayonu ərazisindəki adsız yüksəkliklərdə yerləşən mövqelərdən Gədəbəy rayonu ərazisindəki adsız yüksəkliklərdə yerləşən mövqelərimiz atəşə tutulub.
Yeni “Əli və Nino” abidəsi ucaldılacaq
10.09.2015
Azərbaycanda ilk dəfə olaraq Gəncədə salınan bulvar kompleksi ərazisində “Əli və Nino” heykəli ucaldılacaq
Hazırda abidənin beton-konstruksiya işləri görülür.
Abidənin memarı Cahid Həsənovun AZƏRTAC-a verdiyi məlumata görə, hündürlüyü 3,5 metr olacaq heykəl iki alovun yanması anlamını verəcək və ətrafında süni tüstü effektləri yaratmaqla iki gəncin sanki səmada uçmaları təsvir olunacaq. Bundan başqa, abidənin ətrafında göz yaşlarını xatırladacaq 3 ədəd fəvvarə də olacaq. Şərq üslubunda, lakin modern formada olacaq “Əli və Nino” heykəli vizual görüntü yaradacaq.
Memar onu da diqqətə çatdırıb ki, azərbaycanlı və gürcü gənclərinin sevgisinə ithaf edilən abidə Azərbaycandan əvvəl Çin, Fransa və Gürcüstanda ucaldılıb.
Son 10 ildə turistlər Azərbaycanda 1,3 milyard manat xərcləyiblər
09.09.2015
2005-2015-ci illərdə Azərbaycana gələn turistlər ölkədə 1,3 milyard manat vəsait xərcləyiblər.
Bunu mədəniyyət və turizm nazirinin müavini Nazim Səmədov Xəzər-Avropa Klubunun üzvləri ilə görüşü zamanı bildirib.
Nazir müavini qeyd edib ki, bu müddətdə ölkəyə gələn turistlərin sayı 1,1 milyondan 2,3 milyona qədər artıb: "Hotellərin sayı 262-dən 535-ə, turizm müəssisələrinin sayı isə 197-dən 286-ya çatıb. Hazırda turizm sektorunda 42 min işçi calışır".
N.Səmədov deyib ki, hazırda turizmin Ümumi Daxili Məhsulda payı 4,1 faizdir.
Qarabağda keçiriləcək qondarma “seçkilər”lə bağlı — BƏYANAT
09.09.2015
Dağlıq Qarabağ bölgəsində sentyabrın 13-də qondarma “özünüidarə orqanları”na keçirilən “seçkilər” Azərbaycan Respublikasının Konstitusiyasını, beynəlxalq hüququn norma və prinsiplərini kobud şəkildə pozur və Dağlıq Qarabağda tarixən yaşamış azərbaycanlıların seçki hüquqlarını nəzərə almır.
Ölkə.Az-ın məlumatına görə, bu barədə Azərbaycan Respublikasının "Dağlıq Qarabağ Bölgəsinin Azərbaycanlı İcması” İctimai Birliyinin bəyanatında deyilir.
Bəyanatda bildirilir ki, bütün Azərbaycan xalqının, o cümlədən Dağlıq Qarabağ bölgəsinin azərbaycanlı əhalisinin kəskin etirazına səbəb olmuş bu hadisə İctimai Birliyin İdarə Heyətinin iclasında müzakirə olunub və qətiyyətlə pislənilib.
Azərbaycanda turizm təhlükəsizliyi konsepsiyası hazırlanacaq
09.09.2015
Azərbaycanda turizm təhlükəsizliyi konsepsiyasının hazırlanması və həyata keçirilməsi nəzərdə tutulur. Bu məsələ Mədəniyyət və Turizm Nazirliyi tərəfindən turizm sahəsində qanunvericilik bazasının təkmilləşdirilməsi üçün hazırlanan “Turizm haqqında” yeni qanun layihəsində öz əksini tapıb.
Nazirlikdən Ölkə.Az-a verilən məlumata görə, Ümumdünya Turizm Təşkilatının və Avropa İttifaqının “Tvininq” layihəsinin ekspertlərinin təklif və tövsiyələrinin yer aldığı “Turizm haqqında” qanun layihəsində müasir turizm sənayesinin daha effektli idarə olunması üçün mühüm institusional, tənzimləyici yeniliklər və qabaqcıl təcrübələr öz əksini tapıb.
Müdafiə Nazirliyində kadr təyinatı
09.09.2015
Azərbaycan Müdafiə Nazirliyində (MN) yeni kadr təyinatı olub.
Ölkə.Az “Report”-a istinadən xəbər verir ki, polkovnik İlqar Məmmədov MN-in İşlər İdarəsinin rəisi vəzifəsinə təyin edilib.
İ.Məmmədov bu vəzifəyə qədər nazirliyin İşlər İdarəsində rəis müavini vəzifəsində çalışıb.
Qeyd edək ki, İşlər İdarəsinin əvvəlki rəisi, polkovnik Azad Əsədov xəstəliyi ilə əlaqədar öz xahişi ilə vəzifəsindən azad edilib. O, sentyabrın 8-də dünyasını dəyişib.
Bu gün Jurnalistlərin Beynəlxalq Həmrəyliyi günüdür
09.09.2015
8 sentyabr Jurnalistlərin Beynəlxalq Həmrəyliyi günüdür.
Ölkə.Az xəbər verir ki, Jurnalistlərin Beynəlxalq Həmrəyliyi günü 1958-ci ilin mayında Buxarestdə keçirilən Beynəlxalq Jurnalistlər Təşkilatının IV konqresində qəbul edilən qərara əsasən keçirilir.
Bu gün çex jurnalisti Yuliuse Fuçikenin 8 sentyabr 1943-cü ildə hitlerçilər tərəfindən qətlə yetirilməsinin xatirəsinə təsis olunub.
Biz də Ölkə.Az saytı olaraq, bu bayram münasibətilə bütün jurnalistləri təbrik edirik!
İki, üç ulduzlu hotellərlə bağlı yeni təkliflər açıqlandı
08.09.2015
Azərbaycan Turizm Assosiasiyası ölkədə iki, üç ulduzlu hotellərin tikintisi üçün sahibkarlara müvafliq güzəştlərin verilməsini nəzərdə tutan təkliflərini müzakirə olunması üçün Mədəniyyət və Turizm Nazirliyinə təqdim edib.
Ölkə.Az xəbər verir ki, Assosiasiya sədrinin müşaviri Müzəffər Ağakərimov Trend-ə bildirib ki, iki, üç ulduzlu hotellərin tikintisi üçün sahibkarlara müvafliq güzəştlər edilməlidir.
Təkliflərdə güzəştlərin nələrdən ibarət olmasına gəldikdə, M.Ağakərimov deyib ki, iki, üç ulduzlu hotel tikmək istəyən sahibkarlara 1 il ərzində güzəştlər edilməlidir. Sahibkara torpaq sahəsinin alınması, tikinti işlərinin aparılması üçün güzəştlər olunmalıdır.
Azərbaycanda yeni telekanal və radio yarandı
08.09.2015
Bu gün Milli Televiziya və Radio Şurasının (MTRŞ) növbəti iclası keçirilib.
Ölkə.Az-a MTRŞ-dan verilən məlumata görə, iclasda Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyinin (ASAN xidmət) ümumrespublika radio yayımı və “CBC Sport” MMC-nin ümumrespublika idman televiziya kanalının yayımı üçün xüsusi razılıq (lisenziya) verilməsi barədə müraciətlərinə baxılıb.
MTRŞ tərəfindən “Televiziya və radio yayımı haqqında” qanunun tələblərinə uyğun olaraq dövlət yayımçısı kimi Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyinə 100 MHs tezliyində ümumrespublika radio yayımı, “CBC Sport” MMC-yə isə 37 MHs tezliyində ümumrespublika idman televiziya kanalının yayımı üçün müsabiqədənkənar 6 il müddətinə xüsusi razılıq (lisenziya) verilməsi barədə qərar qəbul edilib.
Bakı Asiya Universiteti bağlandı
08.09.2015
Tələbələrin digər ali təhsil müəssisələrində yerləşdirilməsini xahiş edib
Ölkə.Az xəbər verir ki, Bakı Asiya Universitetinin fəaliyyəti dayandırılıb.
Universitet Təhsil Nazirliyinə müraciət edərək, ali təhsil müəssisəsinin fəaliyyətinin müvəqqəti dayandırılması barədə bu ali məktəbin Elmi Şurasında qərarın qəbul edildiyini bildirmiş və hal-hazırda təhsil alan tələbələrin digər ali təhsil müəssisələrində yerləşdirilməsini xahiş edib.
Təhsil Nazirliyi tərəfindən Universitetin xahişi təmin olunub və 8 ixtisas üzrə təhsil alan 270 tələbənin digər universitetlərdə təhsillərinin davam etdirilməsinə razılıq verilib. Tələbələrin müvafiq ali təhsil müəssisələrinə yerləşdirilməsi mərkəzləşdirilmiş qaydada aparılacaq və proses sentyabrın 10-dək başa çatdırılacaqdır.
Azərbaycan Ordusu erməniləri qorxuya saldı
08.09.2015
Ermənistan Müdafiə Nazirliyi Azərbaycan tərəfini silahlı qüvvələrə nəzarətə dair müqaviləni pozmaqda ittiham edib, səbəb Azərbaycanda komanda-qərargah təlimlərinin keçirilməsidir.
Azərbaycan Silahlı Qüvvələrinin bazar günü başlayan və sentyabrın 13-nə kimi davam edəcək təlimlərinə 65 min hərbçi, 700 ədəd zirehli texnika, 500-dən çox raket və artilleriya qurğuları, 40 təyyarə və helikopter cəlb edilib.
“ATƏT çərçivəsində Azərbaycan və Ermənistanın daxil olduğu silahlı qüvvələrə nəzarətə dair beynəlxalq müqavilələr təlimlərə nəzarət mexanizmini nəzərə alır”, - bazar ertəsi Ermənistan müdafiə nazirinin birinci müavini David Tonoyan bəyan edib.
Zəlzələnin fəsadlarının aradan qaldırılması üçün 2 milyon manat ayrıldı
08.09.2015
“Şəkidə 7 bal gücündə zəlzələ baş verən qəsəbədə 90-a yaxın ailə yaşayır, 90 ev var. Qəsəbə bələdiyyəsinin, icra nümayəndəsinin də yerləşdiyi uşaq bağçası və 4 ev uçub, digər evlərdə də böyük çatlar yaranıb”.
Ölkə.Az Apa-ya istinadən xəbər verir ki, bunu baş nazirin müavini Abid Şərifov deyib.
A. Şərifovun sözlərinə görə, Şəkinin digər kəndlərində də evlərdə çatlar əmələ gəlib, Şəkinin özündə isə bir yaşayış binasının divarı uçub: "Hələ araşdırmalar gedir. Bununla belə, dünən dövlət başçısının göstərişi, Nazirlər Kabinetinin sərəncamı ilə zəlzələnin nəticələrinin aradan qaldırılması üçün ilkin olaraq 2 milyon manat ayrılıb. Yüksək ballıq zəlzələ olmasına baxmayaraq, şükür ki, insan tələfatı, xəsarət alanlar yoxdur”.
Səhiyyə Nazirliyindən dərmanların qiyməti ilə bağlı açıqlama
07.09.2015
“Artıq bir çox şirkətlər dərmanların qiymətlərinin dövlət tərəfindən tənzimlənməsi ilə bağlı qərarın icra vaxtını gözləmədən Tarif (qiymət) Şurasının təsdiqlədiyi ucuz qiymətlərlə dərmanlarını satışa buraxıblar. Lakin qərar sentyabrın 15-dən qüvvəyə minəcəyindən biz də nəzarət tədbirlərinə həmin vaxtdan başlayacağıq”.
Ölkə.Az xəbər verir ki, bunu Trend-ə Səhiyyə Nazirliyinin Analitik Ekspertiza Mərkəzinin Dərmanların Keyfiyyətinə Nəzarət İnspeksiyasının rəisi Pərviz Əzizbəyov deyib.
Müdafiə Nazirliyi hərbi attaşeləri topladı
07.09.2015
Sentyabrın 7-də Müdafiə Nazirliyinin Beynəlxalq Hərbi Əməkdaşlıq İdarəsində 13 dövlətin ölkəmizdə akkreditə olunmuş hərbi attaşeslərinin iştirakı ilə görüş keçirilib.
Ölkə.Az Müdafiə Nazirliyinin məlumatına istinadla xəbər verir ki, müdafiə nazirinin tapşırığına əsasən Beynəlxalq Hərbi Əməkdaşlıq İdarəsinin rəisi general-mayor Hüseyn Mahmudov sentyabrın 6-dan başlayan Silahlı Qüvvələrin bütün qoşun növlərinin döyüşə hazırolma və döyüş qabiliyyətinin yoxlanılması məqsədilə keçirilən Komanda Qərargah Hərbi Oyunları haqqında görüş iştirakçılarına məlumat verib.
Oyunların keçirilmə müddəti və məqsədi, təlimlərdə iştirak edən şəxsi heyətin sayı, cəlb olunan zirehli texnika, aviasiya vasitələri, digər qurğu və sistemlərin miqdarı, eləcə də bu mövzuda digər məsələlər xarici ölkələrin hərbi nümayəndələrinin diqqətinə çatdırılıb.
Dünya tarixçiləri Azərbaycanda toplaşacaq
07.09.2015
Azərbaycan Milli Elmlər Akademiyasının (AMEA) A.A.Bakıxanov adına Tarix İnstitutunun təşəbbüsü ilə dünya tarixçilərinin VIII Beynəlxalq Atatürk Konqresi bu il oktyabrın 13-16-da ilk dəfə olaraq Azərbaycanda keçiriləcək.
Tarix İnstitutundan Ölkə.Az-a verilən məlumata görə, Türkiyə Cümhuriyyəti Atatürk Araşdırma Mərkəzi (ATAM) və AMEA Tarix İnstitutunun birlikdə keçirəcəyi Konqres Azərbaycanın qədim şəhəri Gəncədə keçiriləcək.
Azərbaycan və Türkiyə Prezidentlərinin himayəsi altında keçirilən VIII Beynəlxalq Atatürk Konqresi Azərbaycan Respublikasının və Türkiyə Cümhuriyyətinin ildönümlərinə həsr edilib.
“AMAY” Abdullaya hökm oxundu
07.09.2015
Bu gün Bakı Ağır Cinayətlər Məhkəməsində “AMAY” ticarət mərkəzinin həbsdə olan rəhbəri Abdulla Abdullayev, Heydər Rzayev, Mehman Məmmədxanlı, Elşən Novruzov, Vidadi Qurbanov və Nadejda İlyasovanın barəsində olan cinayət işi üzrə növbəti məhkəmə prosesi keçirilib.
Oxu.Az virtualaz.org-a istinadən xəbər verir ki, məhkəmədə hökm oxunub.
Hökmə görə, Abdulla Abdullayev 13 il müddətinə azadlıqdan məhrum edilib.
Digər təqsirləndirilənlər Heydər Rzayev, Mehman Məmmədxanlı, Elşən Novruzov və Vidadi Qurbanovun hər birinə 9 il, Nadejda İlyasovaya isə 8 il şərti cəza verilib.
Hərbçilərimiz beynəlxalq tədbirlərə gedirlər
07.09.2015
Sentyabrın 7-dən 11-dək Türkiyənin Marmaris şəhərində “Beynəlxalq gəmi və liman ərazisinin təhlükəsizliyi” kursu, 18-dək Ankara şəhərində “Hərbi-Mülki əməkdaşlıq” kursu, oktyabrın 16-dək Çexiyanın Vişkov şəhərində Çoxmillətli Sülhü Dəstəkləmə Əməliyyatları üzrə təlimatçı hazırlığı kursu, noyabrın 27-dək Böyük Britaniyanın Şrivenhəm şəhərində Hərbi İngilis dili kursu, dekabrın 18-dək Litvanın Vilnüs şəhərində kiçik rütbəli zabitlər üçün qərargah kursu, sentyabrın 8-dən 16-dək Poşanın Varşava şəhərində NATO Standartlaşdırma kursu keçiriləcək.
Bakı-Moskva qatarına biletlər bahalaşdı
07.09.2015
Dərmiryolu stansiyasında Bakı-Moskva reysi üzrə hərəkət edən qatarlara biletlərin qiyməti bahalaşıb.
Ölkə.Az xəbər verir ki, bu barədə vətəndaşlar baku.ws-ə şikayətlərində bildiriblər.
Şikayətçilərin sözlərinə görə, bu istiqamət üzrə qatarlara biletlər tapılmır. Lakin israr etdikdə kassada biletləri üstündə yazılan qiymətdən baha satırlar.
Ölkə.az
