Tanınmış ictimai xadimin qırx mərasimi keçiriləcək
Tanınmış ictimai xadim Tofiq Quliyevin qırx mərasimi keçiriləcək
Bu barədə Ölkə.Az-a T.Quliyevin bacısı oğlu, xalq artisti İlham Namiq Kamal məlumat verib. Sənətkar bildirib ki, məclis sentyabrın 22-də saat 3-də Təzəpir məscidində olacaq.
Qeyd edək ki, ömrünün 73-cü ilində dünyasını dəyişən Tofiq Quliyev ilk təhsilini Asəf Zeynallı adına musiqi məktəbində alıb, 1966-cı ildə buranı bitirib. O, 1975-ci ildə Azərbaycan Dövlət Pedaqoji İnstitutunun filologiya fakültəsini bitirib.
1958-ci ildən əmək fəaliyyətinə fəhlə kimi başlayan Quliyev Tofiq Əşrəf oğlu müxtəlif vəzifələrdə çalışıb, 1970-ci ildə Lenin adına Toxuculuq Kombinatının Mədəniyyət klubuna müdiri təyin edilib. Çalışdığı bütün sahələrdə, kollektivin sevgisini, rəhbərliyin isə ən yüksək etimadını qazanmağa nail olan Tofiq Quliyev 1973-cü ildən 2002-ci ilin noyabr ayına kimi Respublika Müəllimlər evinin direktoru işləyib.
1977-ci ildən 2000-ci il tarixinə kimi Azərbaycan Respublikasının Ali Məhkəməsinin Xalq İcraçılar Şurasının sədri vəzifəsində çalışıb.
T.Quliyev 2002-ci ildə Azərbaycan Sahibkarlıq və Elm, Elmi-İstehsalat Müəssisələri İşçiləri Müstəqil Hİ Respublika Komitəsinin sədri seçilib. Sahə Komitəsinin V Konfransında (noyabr 2007-ci il) yenidən həmin vəzifəyə seçilib. AHİK-in Məclis və İcraiyyə Komitəsinin üzvü olub.
Əmək fəaliyyəti ərzində «Həmkarlar İttifaqlarının mədəni-maarif müəssisələrində əla fəaliyyətinə görə», «Kəndə mədəni hamilik əlaçısı», «Silahlı qüvvələrə mədəni hamilik əlaçısı» döş nişanları ilə, «Xalqlar dostluğu» ordeni, «Əməkdar mədəniyyət işçisi» fəxri adı və «Azərbaycan Həmkarlar İttifaqlarının 100 illik yubiley» medalı ilə təltif edilib.
Ölkə.Az
