İlahiyyatçı: \"Qurban kəsmək yalnız həcc ziyarətində olan zəvvarlara vacibdir\"

Qarşıdan müqəddəs Qurban bayramı gəlir.

Qurban bayramı necə keçirilməlidir, Azərbaycanda bu bayramı düzgün qeyd edirlər ya yox? Bayramın qaydalarına düzgün əməl olunurmu? Bu suallara cavab tapmaq üçün ilahiyyatçı fikrini öyrəndik.

Qurban bayramı haqqında fikirlərini ilahiyyatçı Rəsul Mirhəşimli Ölkə.Az-la bölüşüb:

"Qurban bayramı İslamın iki vacib bayramından biridir. Bu bayram müsəlmanlara Hz.İbrahimin (ə) sünnəti olaraq, Allahın lütf etdiyi bayramdır. Allah-Təala Qurani-Kərimdə buyurur: "Biz hər bir ümmət üçün qurbangah (yaxud məbəd) müəyyən etdik (və ya hər bir ümmətə qurban kəsməyi lazım bildik) ki, Allahın onlara ruzi verdiyi (dördayaqlı) heyvanların üstündə (onları kəsdikləri zaman) Allahın adını çəksinlər" ("Həcc"surəsi, ayə 34).

Qeyd edim ki, qurban kəsmək Qurani-Kərimin başqa ayələrində də qeyd olunur. Qurban sözünün hikmət olaraq anlamı yaxınlaşmaq deməkdir. Yəni insan nəfsi istəklərindən əl çəkib Allaha yaxınlaşmaq istəyir. O ki, qaldı ölkəmizdə müsəlmanların qurbanlıq heyvan kəsmələrinə, bu məsələ fərdi xarakter daşıyır. Çünki hər kəs şəxsi imkanlarını nəzərə alaraq qurban kəsir. Qurban kəsmək yalnız həcc ziyarətində olan zəvvarlara vacibdir. Həcdə olmayan insan qurbanlıq heyvan kəsməklə xeyirxahlıq etmək istəyir. Allah rizası üçün qurban kəsən hər kəsin ibadət və duaları qəbul olunsun! Amin!"

Xatırladırıq ki, Azərbaycanda Qurban bayramı 24-25 sentyabrda keçiriləcək.

Səxavət Məmməd
Ölkə.Az