Bu qərəzli kağız parçaları Azərbaycanı haqq yolundan döndərə bilməz - Deputat
“15 oktyabr 2023-cü il, tarixi ədalət təntənəsinin rəmzi olmaqla, Azərbaycan xalqının yaddaşında əbədi həkk olunacaq. Məhz bu tarixdə Azərbaycan Respublikasının Prezidenti, Müzəffər Ali Baş Komandan İlham Əliyev ölkəmizə rəhbər seçilməsinin 20-ci ildönümündə Xankəndidə, Xocalıda, Ağdərədə, Xocavənddə, Əsgəranda və Sərsəng su anbarının ərazisində müqəddəs bayrağımızı qaldırmaqla Azərbaycan xalqının çoxillik əzablarına, iztirablarına, həyacanına son qoydu, torpaqlarımızın hər bir qarışına sahib çıxdı, regionda tüğyan edən separatçılığın kökünü kəsdi, ölkəmizin tarixi Zəfərini rəsmiləşdirdi”.
“Ölkə.Az” xəbər verir ki, bunu deputat Kamran Bayramov deyib.
Deputat bildirib ki, cənab Prezident dünyada və regionda mövcud olan mürəkkəb vəziyyətə, bütün daxili və xarici maneələrə, təsirlərə və təzyiqlərə baxmayaraq, düz 20 il bundan əvvəl xalqına verdiyi vədləri təmkinlə, məharətlə, cəsarətlə yerinə yetirdi, Azərbaycan torpaqlarını erməni işğalından azad etdi, Qarabağ münaqişəsinə son qoydu, ölkəmizin ərazi bütövlüyünü və suverenliyini bərpa etdi:
“Dövlətimizin və xalqımızın həyatındakı faciəli və dəhşətli səhifələr, nəhayət, geridə qalır. Qarşıda isə bizi gözəl, xoşbəxt günlər gözləyir. Heç bir şübhə yoxdur ki, cənab Prezident doğma Qarabağımıza şöhrətini qaytaracaq, hər bir şəhərinin, qəsəbəsinin, kəndinin bərpasını, yenidən qurulmasını başa çatdıracaq, soydaşlarımızın doğma diyarlarına qayıdışını təmin edəcək və ən əsası, Qarabağa sülh, inkişaf və əmin-amanlıq gətirəcək.
Amma təəssüflə qeyd etmək lazımdır ki, sevinənlərlə yanaşı, Azərbaycanın Zəfərinə və triumfuna sevinməyənlər, cənab Prezidentin Xankəndidə qeyd etdiyi kimi, vaxtı ilə Ermənistanı işğala təhrik edənlər, dəstək verənlər və bəraət qazandıranlar var.
Bəli, həmin dövlətlərin, qurumların, qüvvələrin Azərbaycana qarşı münasibəti bu gün də dəyişməyib, amma unutmasınlar ki, Azərbaycan dəyişib! İlham Əliyevin sayəsində ölkəmiz daha güclü, daha qüdrətli, daha uğurlu olub! Bu gün Azərbaycan Cənubi Qafqazın siyasi, iqtisadi və hərbi lideri olmaqla, dünyada siyasi çəkisi, müttəfiqlərinin sayı gündən-günə artmaqdadır.
Buna görə də həmin dövlətlər, qurumlar, qüvvələr bilsinlər ki, onların ölkəmizə qarşı qərəzli təxribat cəhdləri, qəbul etdikləri kağız parçaları Azərbaycanı haqq yolundan döndərə bilməz, onun güclənməsinə və inkişafına, regionda və dünyada nüfuzunun artmasına təsir göstərə bilməz”.
Mürtəza
Ölkə.Az
