"Müstəqillik dövründə bayrağımız indiyədək Xankəndidə dalğalanmamışdı"

Tarixi qaliblər yazır və cənab İlham Əliyevin işğala, separatizmə son qoyub Xankəndidə bayrağımızı ucaltması, məhz qalibin yazdığı tarixdir.

“Ölkə.Az” xəbər verir ki, bunu deputat Bəhruz Məhərrəmli  parlamentdə çıxışı zamanı deyib.

O əlavə edib ki, təsis olunduğu gündən üçrəngli bayrağımız indiyədək Xankəndidə dalğalanmamışdı. 

“Bu mənada Prezident İlham Əliyevin Xankəndi triumfu dövlətçilik tariximizin ən önəmli prosesləri ilə bərabər tutulacaq hadisədir”, - o qeyd edib.

O deyib ki, Heydər Əliyevin siyasi hakimiyyətdən kənarlaşdırıldığı şəraitdə, Azərbaycan Xalq Cəbhəsi - Vəzirov - Mütəllibov tandemi bu keçidi nə təmin edə bildi, nə də etmək istədi: “Çünki onların ümdə hədəfi müstəqillik yox, Heydər Əliyevin qayıtmasını əngəlləmək idi və bu yolda nəinki Xankəndi, bütövlükdə Qarabağ və Şərqi Zəngəzuru qurban verməyə hazır idilər və verdilər də.

Düzdür, Heydər Əliyevsiz 6 il bizi 10 illərlə geri saldı, amma 32 il sonra cənab İlham Əliyevin Xankəndidə ucaltdığı bayrağı o deməkdir ki, biz artıq yeni tarixə qədəm qoyuruq və fəxrlə deyə bilərik ki, Heydər Əliyevin görmək istədiyi Azərbaycan məhz bu idi. Cənab İlham Əliyev Xankəndidən bəyan etdi ki, “Biz bu qələbəyə layiqik”.
Həqiqətən də Heydər Əliyev yolunda olan hər kəs bu qələbəyə layiqdir”. 

Mürtəza
Ölkə.Az