Yadda qalan ciddi təyinatlar - 2023-ün vəzifə dəyişiklikləri

2023-cü il bir çox hadisələrlə yanaşı, həm də vəzifə təyinatları ilə yadda qaldı.

Ölkə.Az xəbər verir ki, bu il postunu tərk edənlər və yeni vəzifəyə gələnlər də oldu.

Onların siyahısını təqdim edirik:

İlk olaraq bu ilin 15 fevralında Prezident İlham Əliyev sərəncamı ilə Azərbaycan SSR Xalq rəssamı Ömər Eldarov Rəssamlıq Akademiyasının rektoru vəzifəsindən azad edildi, onun yerinə Natiq Əliyev təyin oldundu.

Prezident İlham Əliyevin 4 martda imzaladığı sərəncamla ekologiya və təbii sərvətlər nazirinin müavini Firdovsi Əliyev vəzifəsindən azad edildi və onu Milli Hidrometeorologiya Xidmətinin rəisi olmuş Umayra Tağıyeva əvəzlədi.

Bu ilin 25 oktyabrında isə dövlət başçısının digər sərəncamı ilə Alı İbrahim oğlu Qocayev Samux Rayon İcra Hakimiyyətinin başçısı postundan göndərildi. Yerinə Firdovsi Əliyev təyinat aldı.

2018-ci ildən kənd təsarrüfatı naziri kimi çalışan İnam Kərimov 4 apreldə Milli Məclisin qərarı ilə Ali Məhkəmənin hakimi təyin edildi.

Boş qalan kənd təsarrüfatı naziri vəzifəsi isə Məcnun Məmmədova həvalə olundu.

14 apreldə isə Prezident İlham Əliyevin sərəncamı ilə daha yüksək bir vəzifə təyinatı baş tutdu. Belə ki, Adil Kərimli mədəniyyət nazirinin birinci müavini vəzifəsindən azad edilərək boş qalan mədəniyyət naziri postuna təyin olundu.

2012-ci ildən Səfərbərlik və Hərbi Xidmətə Çağırış üzrə Dövlət Xidmətinin rəisi kimi fəaliyyət göstərən general-polkovnik Arzu Rəhimov 11 illik postundan uzaqlaşdırıldı. Onun yerinə Mürsəl Qorxmaz oğlu İbrahimov 17 apreldə rəis təyin olundu.

Dövlət başçısının 23 may tarixli daha bir sərəncamı ilə Elmira Axundova Azərbaycan Respublikasının Ukraynada fövqəladə və səlahiyyətli səfiri, eyni zamanda Azərbaycan Respublikasının Demokratiya və İqtisadi İnkişaf Uğrunda Təşkilat – GUAM yanında daimi nümayəndəsi vəzifələrindən geri çağırıldı. O, İlham Əliyevin 17 oktyabr tarixli növbəti sərəncamı ilə Bakı Beynəlxalq Multikulturalizm Mərkəzinin Himayəçilik Şurasının üzvü təyin edildi.

14 iyunda isə daha bir məmur - Quba Rayon İcra Hakimiyyətinin başçısı Ziyəddin İsmayıl oğlu Əliyev vəzifəsindən azad edildi və avqustda ondan sonra boş qalan yerə İlqar Akif oğlu Mahmudov təyinat aldı.

10 iyulda isə Daxili İşlər Nazirliyinin (DİN) Mətbuat xidmətinin rəisi polis polkovniki Ehsan Zahidov xidmətdə olmanın son yaş həddi ilə əlaqədar təqaüdə göndərildi, onun yerinə bu posta polis polkovnik-leytenantı Elşad Hacıyev keçirildi.

Həmin gün Ceyhun Həsənov Penitensiar Xidmətin rəisi vəzifəsindən azad edildi, Prezident onun yerinə Mirsaleh Seyidovu təyin etdi.

Daşkəsən Rayon İcra Hakimiyyətinin başçısı olmuş Əhəd Abıyev də Prezident İlham Əliyevin sərəncamı ilə bu ilin 17 iyulunda 12 illik vəzifəsi ilə vidalaşdı.

5 avqustda Rəcəb Rəhimli Naxçıvan Muxtar Respublikası Ordubad Rayon İcra Hakimiyyətinin başçısı təyin olundu. 4 gün sonra isə Mahirə Adnayeva Sədərəyin icra başçısı postundan uzaqlaşdırıldı.

Azərbaycan Dövlət Aqrar Universitetinin (ADAU) rektoru İbrahim Həsən oğlu Cəfərov da vəzifəsindən azad edilənlər siyahısında idi.

Bu il Dövlət başçısınının sərəncamı ilə uzun illərdir çalışdığı vəzifəni tərk edənlərdən biri də “Azərbaycan Hava Yolları” Qapalı Səhmdar Cəmiyyətinin prezidenti Cahangir Əsgərov oldu. O, Prezidentin 1 sentyabrda verdiyi sərəncamla 15 illik postunu tərk etdi.

İcra başçıları arasında tutduğu vəzifədən uzaqlaşdırılanlardan biri də Siyam Çərkəz oğlu Hacıyev oldu. Onun Naxçıvan Muxtar Respublikası Culfa rayonundakı bu fəaliyyətinə xitam verildi.

Son olaraq isə bu ilin 18 noyabrında Mədət Quliyev müdafiə sənayesi naziri vəzifəsindən azad edildi. Onun yerinə Vüqar Mustafayev gətirildi.

M.Quliyev isə Azərbaycan Respublikası Təhlükəsizlik Şurası katibinin müavini təyin edildi.