"AzParkinq"in həll yolu: "Vətəndaş, bu, sizin probleminizdir"

Metbuat.az-ın direktoru Ramil Mirzəyev "AzParkinq"in qaynar xəttindən narazılığını ifadə edib.

Sosial şəbəkə hesabında başına gəlmiş hadisəni yazan Ramil Mirzəyev bildirir ki,  "AzParkinq"in qaynar xətti yaranmış problemin aradan qaldırılmasında fəaliyyətsizlik göstərib.

"Deməli, avtomobili park edərkən tələsdiyimdən məntəqənin nömrəsini yanlış yazıb SMS-lə göndərmişəm, nəticədə başqa məntəqə qeydə alınıb. "AzParkinq"in əməkdaşı da yoxlamadan yenidən əlavə olaraq vaxtı aktivləşdirib. Biri üçün 5 AZN olmaqla eyni vaxtda iki məbləğ hesablanıb. Düzgün olanı ödəmişəm və digərinin ləğvi üçün 141 qaynar xəttinə zəng vurmuşam. Xanım operator deyir ki, gərək səhv etməyəydiniz. Etmisinizsə, zəhmət çəkin, ödəyin. "Vətəndaş, bu sizin probleminizdir", öz  səhvinizdir-filan.

Başa salam bilmədim ki, qaynar xətt elə belə məsələlərin həlli üçün mövcuddur, buna görə maaş alırsınız, yoxsa nəyə lazımdır belə dəstək".