“Biabırçı layihə keçirib, buna sirk tamaşası da deyə bilərik” – Şahin İsmayılov 

“Dekabrın 16-da bir qrup dırnaqarası siyasətçi daha bir biabırçı layihə keçirib. Bəli, layihə. Qrant aldıqları “təəssübkeş”lərə hesabat vermək məqsədilə hazırlanmış sirk tamaşası da deyə bilərik. Özünü müxalifət adlandıran Əli Kərimli və onun dəstəsinin məntiqsiz fikirləri heç kimə maraqlı deyil. Niyə? Çünki xalqın gözü tərəzidir. Azərbaycan xalqı Əli Kərimlinin kimliyini də, Azərbaycanı qalib edən böyük siyasətçinin xidmətlərini də yaxşı bilir. Əgər Əli Kərimli xalqını sevəndirsə, gəlsin Azərbaycan xalqına böyük qələbələr yaşadan şəxslərə təşəkkürünü bildirsin”.

Ölkə.Az xəbər verir ki, bunu deputat Şahin İsmayılov parlamentdə çıxışı zamanı deyib.

Onun sözlərinə görə, Kərimli yaxşı bilir ki, seçkilərə qatılsa, biabırçı şəkildə uduzacaq: “Alternativ variant kimi manipulyasiyanı seçir. Lakin, bir şeyi unudub ki, onun bu cəhdi də seçkilərdəki şansı kimi fiaskoya uğrayacaq. Deyəsən, Kərimli suverenliyini təmin etmiş Azərbaycanın qalibiyyəti ilə hələ də barışa bilməyib. Axı, 30 il sonra alınan torpaqların itirilməsində böyük xidmətləri olmuşdu”.

İsmayılovun fikrincə, sağlam rəqabətin yeganə legitim vasitəsi olan seçkilərdə iştirak etməkdən imtina etməyin əsas səbəbi odur ki, Kərimli heç bir nüfuza sahib olmadığını, seçkilərdə birabırçı şəkildə uduzacağını və havadarlarının qarşısında pis vəziyyətə düşəcəyini yaxşı bilir: “Belə olan halda hiyləgərliyə əl atır və siyasi karyerası üçün bir ümid yeri axtarır. Bu da onu ölkəmizin gücünü həzm edə bilməyən müxtəlif siyasi qüvvələrin sifarişlərini yerinə yetirmək kimi çirkin missiyanın icrasına şövq edir. Beləliklə, Əli Kərimli Azərbaycan xalqına qarşı çirkin əməllərini sevə-sevə həyata keçirir. Müstəqilliyimizin bərpasının ilk illərində olduğu kimi. Fərq isə yalnız ondadır ki, o zaman eyni hədəfə hakimiyyətdə xidmət edirdi, indi isə müxalifət düşərgəsində.

Sonda onu da vurğulamaq lazımdır ki, Əli Kərimli həm də xaraktersiz xarakterdir - Müstəqilliyin itirilməsi təhdidi, səriştəsizlik, pozuculuq, xainlik, xəyanət və s. bu kimi çoxlu neqativ xarakteristikaları özündə birləşdirən cılız siyasi obraz. Kərimlinin sadiqliyi və xidmətləri yalnız Azərbaycana qarşı təxribat hazırlayan pozucu qüvvələr qarşısındadır. Müdrik Azərbaycan xalqı onu deyil, özünün əsl xarizmatik liderini dəstəkləyəcək. Əli Kərimli və onun donorlarının arzusu ürəyində qalacaq. Çünki Azərbaycanda xalq-iqtidar birliyi yüksək səviyyədədir. Xalq öz liderini sevir və hər zaman dəstəkləyəcək”.

Mürtəza
Ölkə.Az