Azərbaycanla sülh Rusiyada imzalanmayacaq? - Paşinyanın zirzəmi qorxusu
Azərbaycanla Ermənistan arasında sülh müqaviləsi Rusiyada bağlanmaya bilər.
Ölkə.Az xəbər verir ki, bu barədə Ermənistanın “Hraparak” nəşri yazıb.
Belə ki, Ermənistanın baş naziri Nikol Paşinyan dekabrın 16-da Moskvada MDB Hökumət Başçıları Şurasının iclasına qatılmamışdı. Ermənistanı iclasda baş nazirin müavini Mqer Qriqoryan təmsil edirdi. Dekabrın 24-də isə Avrasiya İqtisadi Birliyinin toplantısı gözlənilir. Həm Rusiyada, həm də Azərbaycanda Paşinyanın bu toplantıya qatılıb-qatılmayacağı barədə gözləntilər var. Amma görünür ki, Nikol bu dəfə də gözləntiləri doğrultmayacaq.
Qəzet yazır ki, Vladimir Putin prezident olduğu müddətdə Paşinyan Rusiya Federasiyasına getməyəcək. Roma Statutunun Ermənistanla Rusiya arasında “boşanma sənədi” olduğu ortaya çıxdı. “Hraparak” Paşinyanın baş nazir olduğu müddətdə Putinin də Ermənistana gəlməyəcəyini qeyd edib.
Qeyd olunur ki, Paşinyan da Rusiya Federasiyasına getməyəcək, çünki Rusiyanın Roma Statununu ratifikasiya etməməsi Putin üçün Nikolanın əl-ayağını bağlayıb FSB-nin zirzəmisinə göndərmək üçün maneə deyil:
“Paşinyanla yanaşı, Roma Statutunun qəbulunu və ratifikasiyasını alqışlayan parlamentin spikeri Simonyan, Təhlükəsizlik Şurasının katibi Qriqoryan və Müdafiə Nazirliyinin rəhbəri Papikyan da Rusiya Federasiyasına getməkdən imtina ediblər” - məlumatda deyilir.
Bütün bunlar isə Azərbaycanla Ermənistan arasında sülh müqaviləsinin Rusiyada bağlanmama ehtimalını gündəmə gətirir.
Qeyd edək ki, Roma Statutu Beynəlxalq Cinayət Məhkəməsinin nizamnaməsi kimi xidmət edən beynəlxalq müqavilədir. Məhkəmənin səlahiyyətlərinə soyqırım, insanlıq əleyhinə cinayətlər, müharibə cinayətləri və təcavüzə görə məsuliyyət daşıyanların təqib edilməsi daxildir.
