Azərbaycanda mal-qaranın sayı azalıb: ətin bahalaşması qaçılmazdır

"Gələn il ətin qiymətinin bahalaşması qaçılmazdır". 

Bunu İqtisadiyyat.az-a açıqlamasında iqtisadçı Eldəniz Əmirov deyib.

Onun sözlərinə görə, ət və ət məhsullarının qiyməti hər zaman artıma meyllidir: "Çünki ət ərzaq məhsulları siyahısındadır. Ərzaq məhsullarının qiyməti inflyasiyanın xüsusi çəkisində orta göstəricidən həmişə yüksək olur".

İqtisadçı bildirib ki, bu ilin oktyabr ayına olan məlumata görə, iribuynuzlu və xırdabuynuzlu heyvanların sayı azalıb: "İribuynuzlu heyvanların sayı 2.5 milyon baş təşkil edib. Yəni ötən ilin müvafiq dövrü ilə müqayisədə 4.3 faiz azalıb. Xırdabuynuzlu heyvanların sayı isə 8.9 faiz azalıb. Ölkədə intensiv maldarlığa keçid, yəni daha çox cins mallara üstünlük verilməsi nəticəsində ümumi tendensiyada ət istehsalına ciddi təsir göstərməyib. Bütün hallarda yüksələn inflyasiya və əhalinin tələbatının artması fonunda ölkə mal ətinə olan təminatı tam şəkildə ödəyə bilmir. Nəticədə idxal səviyyəsi yüksəlir və bu, daxili bazara təsirsiz ötüşmür".

Ekspert hesab edir ki, ötən il və bu il kimi qarşıdakı dövrdə yüksək inflyasiya gözlənilmir. Lakin buna baxmayaraq, ətin qiymətinin bahalaşması qaçılmazdır:

"Bu bahalaşmaya bir sıra amillər təsir edəcək. Xüsusən də ərzaq təhlükəsizliyi baxımından ölkədə taxıl əkin sahələrinin həcmi artırılıb. Kənd təsərrüfatı təyinatlı torpaqların əkin üçün ayrılması örüş sahələrinə mənfi təsir göstərir. Son 20 ildə örüş sahələrində təxminən 400 min hektara yaxın azalma var. Bu isə heyvandarlığın inkişafına əngəl törədir".

Qeyd edək ki, Azərbaycan bu ilin yanvar-noyabr ayları ərzində 104,7 milyon dollar dəyərində diri heyvan idxal edib. Ölkənin diri heyvan idxalına çəkdiyi xərc illik müqayisədə 37,1 milyon dollar və ya 55 % çoxdur.