Prokurorluq İbrahim Nehrəmli ilə bağlı araşdırmaya başladı

Fevralın 1-də özünü yandıraraq intihar edəcəyini deyən Qazax rayonundan olan iş adamı Elşad Məmmədov yanvarın 31-də Baş prokurorluq yanında Korrupsiyaya qarşı Mübarizə İdarəsinin rəisi Kamran Əliyev onu qəbul edib.

"Kamran Əliyevlə görüşdə problemin mahiyyəti müzakirə olundu. Kamran müəllim bildirdi ki, bir həftəlik müddət ərzində iş mahiyyəti üzrə yenidən araşdırılacaq”, - deyə Elşad Məmmədov bildirdi.

İş adamı bu səbəbdən intihar qərarından müvəqqəti daşındığını da bildirdi: “Mən inanıram ki, korrupsiyaya qarşı mübarizə idarəsi işi mahiyyəti üzərə araşdırıb, haqqımın bərpasında rol oynayacaq. Ona görə də prokurorluq orqanlarının sözlərini nəzərə alaraq 1 həftəlik olaraq qərarımdan müvəqqəti daşınmışam».

Qeyd edək ki, özünü yandıracağını deyən Qazax rayonundan olan sahibkar Elşad Məmmədov “Avesta” konserninin prezidenti Hacı İbrahim Nehrəmlini və daha bir neçə şəxsi ittiham edən açıqlama ilə çıxış etmişdi. Elşad Məmmədov açıqlamasında bunları demişdi: “Məni bu addımı atmağa vadar edən Hacı İbrahim Nehrəmli və onun məmur qardaşının hökmündən qorxan məhkəmələr, hüquq-mühafizə orqanlarıdır. Düz iki ildir ki, mən Hacı İbrahim Nehrəmli tərəfindən mənimsənilən 355 min manatımın davasını döyürəm. Amma kimsə mənim - yetim oğlanın haqqının bərpasına yardım etmədi”.

Xatırladaq ki, Elşad Məmmədov iş adamı Hacı İbrahim Nehrəmlinin ona məxsus 335 min manatlıq iki mənzili mənimsədiyini iddia edir./azadlıq/

Ölkə.Az