Yanan bina ətrafında şeytan üçbucağı:

"Məmurlardan hansısa kişi kimi boynuna alsa ki, sizin kompensasiyanıza ehtiyacım var, ürəklə o pulu ona verərik"

Mayın 19-da Binəqədi rayonunda çoxmərtəbəli binada baş verən dəhşətli yanğın zamanı avtomobillərinə və digər əmlaklarına ziyan dəymiş vətəndaşlar etiraz aksiyası keçirib.

Ölkə.Az xəbər verir ki, yanan bina sakinlərinin etiraz aksiyası keçirməsinə səbəb məmur özbaşınalığı və məmurların ötür-ötür oyunudur. Prezident İlham Əliyev bildirib ki, yanğın zamanı zərər çəkən hər bir vətəndaşa kompensasiya ödənilməlidir. Ancaq məmurlar prezidentin sözünə əməl etmir.

Binəqədi Rayon İcra Hakimiyyətinin başçısı İsgəndərov Xaləddin sakinlərə bu məsələ ilə Bakı Şəhər İcra Hakimiyyətinin başçısı Hacıbala Abutalıbovun məşğul olduğunu deyib. Hacıbala Abutalıbov isə əvvəlcə sakinlərə narahat olmayın, kompensasiyanız veriləcək deyib, ancaq son günlərdə isə Bakı meri bu məsələyə Abid Şərifovun baxdığını bildirib. Abid Şərifov isə kompensasiya ilə bağlı məsələyə yanan bina ilə bağlı komissiyanın baxdığını deyib. Zərərçəkənlər Bermud üçbucağının - Hacıbala Abutalıbov, Abid Şərifov və Xaləddin İsgəndərovun süründürməçiliyindən bezərək son hədd olaraq özlərini yandıracağını bildirir.

"...bizə söz verib ki, kompensasiyamız ödəniləcək, ancaq verdikləri elə söz olur, kompensasiya yox"

Daşdəmirov Zəmanət: "Avqustun 15-i baş nazirin birinci müavini Abid Şərifov bizi Binəqədi İcra Hakimiyyətinə topladı, bildirdi ki, bütün zərərçəkənlərə kompensasiya ödəniləcək. 15 avqustdan bu günə kimi heç bir zərərçəkənə kompensasiya ödənilməyib. Maşınsız qalmışam, işyerisiz qalmışam. Müraciətin, şikayətin elə bir növü qalmayıb ki, onu etməyək. İndiyənə qədər dövlətdən heç bir kömək istəməmişik. Bizi dilənçi gününə salıblar. Mənim iş yerim yanıb. Biz yalnız dəymiş ziyanın ödənilməsini istəyirik. 16 ildir ki, bu binanın sakiniyəm. Evin yanında obyektim var idi. Ailəmi oradan dolandırırdım. Mənə 15 min manat ziyan dəyib. Söz verdilər ki, obyektin içərisini də təmir edəcəklər, ancaq üz hissəsini təmir edib getdilər. Hətta obyektimin qapısını da üzləmişdilər ki, birdən prezident açılışa gələr, obyektin içərisi görünməsin. Abid Şərifov da, Hacıbala Abutalıbov da, Xaləddin İsgəndərov da bizə söz verib ki, kompensasiyamız ödəniləcək, ancaq verdikləri elə söz olur, kompensasiya yox.

"Məsələni bir-birilərinin üstünə atırlar. Arada qalan da biz olmuşuq"

Mustafayev Tofiq: "Yanan binada zərəçəkənlər arasında biz də varıq. Abid Şərifov, Hacıbala Abutalıbov, Xaləddin İsgəndərov dəfələrlə bizə söz versə də, hələ bizə dəyən ziyan ödənilmir. Prezident İlham Əliyev bildirmişdi ki, vətəndaşlara dəyən ziyan ödənilsin. Ancaq məmurlar prezidentin sözünə əməl etmir. Məsələni bir-birilərinin üstünə atırlar. Arada qalan da biz olmuşuq. Mənim avtomobilim bina yanarkən zərər çəkib. Servis 6 min 500 manat ziyan dəydiyini bildirib, ancaq özlərinin keçirdiyi ekspertiza avtomobilimə 4 min manat ziyan dəydiyini bildirir. 6 min 500 manatı istəmirəm, özlərinin yazdığı 4 min manatı versinlər ki, köhnə maşın alıb işimə gedib-gələ bilim.

Rizvanov Qəribağa: "Hamımız eyni vəziyyətdəyik. Maşınım binanın qarşısında idi. Servis avtomobilimə 2 min manat zərər dəydiyini təyin edib. Abid Şərifov siyahını oxuyanda isə 3 min 500 manat zərər dəydiyini dedi. Aldadırlar bizi. Bu günə kimi bizə heç bir şey verməyiblər.

"İcra Hakimiyyətinin qapısına gedib gəlməkdən çox adam elə bilir ki, oranın işçisiyik"

Hüseynov Ülvi: "Mənim də avtomobilim bina yanan zaman yanıb. Maşınımın dəyəri 10 min manatdan çox olduğu halda avtomobilimə 6 min 500 manat dəyər qoyublar. Buna da razı oldum. Avqust ayının 15-dən söz verildi ki, 2 həftə ərzində məsələ həll olunacaq, hələ də gözləyirik. Axırıncı dəfə Binəqədi Rayon İcra Hakimiyyətinin nümayəndəsinə zəng vurduq ki, kompensasiya məsələsi nə oldu? Cavabında bildirdilər ki, gedin nə bilirsiz edin, bizə deyiblər ödəniləcək. Hansı formada, nə vaxt ödəniləcəyini bilmirik. Gedin məhkəməyə müraciət edin.

Əgər bu kompensasiya dövlət tərəfindən ayrılıbsa biz nəyə görə məhkəməyə müraciət etməliyik? Məhkəməyə müraciət etsək guya bizim pulumuzu verəcəklər?

Bizə düşən kompensasiyanı vermək istəmirlərsə desinlər. Biz də öz başımıza əlac qılaq. Əgər o kompensasiyanı yemək istəyən məmur varsa çıxsın kişi kimi desin ki, mənim o pula ehtiyacım var, o pulu ona halal edərəm. İcra Hakimiyyətinin qapısına gedib gəlməkdən çox adam elə bilir ki, oranın işçisiyik".

Bina sakinləri Bakı meri Hacıbala Abutalıbova müraciət edəcək ki, onlar üçün yer ayırsın və kompensasiya ala bilməyən vətəndaşlar etiraz aksiyası etsin. Sakinlər bildirdi ki, əgər aksiyalarımızın nəticəsi olmasa məcburuq ya xarici səfirliklərə müraciət edək, ya da özümüzü yandıraq.

Səxavət Məmməd
Fotolar: Nurlan Gülməmmədov
Ölkə.Az