DİN müsavatçı gəncin həbsindən xəbərsizdir

Fərəc Kərimlidən hələ də xəbər yoxdur

Bu gün səhər saatlarında həbs edilən Müsavat Gənclər Təşkilatının sədr müavini Fərəc Kərimlidən harada olmasından hələ də xəbər yoxdur. Gənc fəalın həbsindən keçən müddət ərzində hüquq-mühafizə orqanlarına, 102 xidmətinə xəbər verilsə də, cavab verilməyib. Ailəsi də Fərəc Kərimlinin oğurlanmasından ciddi narahatdır. 

Fərəc Kərimlinin həbsi, hazırda harada saxlanılması ilə bağlı Daxili İşlər Nazirliyi ilə əlaqə saxladıq. Qurumun mətbuat xidmətinin rəhbəri Ehsan Zahidov baş verən hadisədən xəbərsiz olduqlarını bildirdi: “Belə bir hadisədən xəbərimiz yoxdur. Bizə məlumat daxil olmayıb. Nə üçün, harada saxlanılması barədə sizə dəqiq bir şey deyə bilmərəm. Amma bu istiqamətdə araşdırmalarımızı aparacağıq. Heç kəs narahat olmasın. Qısa müddətdə hər şey aydın olacaq”.

Qeyd edək ki, müsavatçı gənc fəalın bir həftə öncə qardaşı Sirac Kərimli həbs edilib. Onun barəsində artıq 234-cü maddə ilə cinayət işi açılıb. Vəkil və yaxınları Fərəc Kərimlinin siyasi fəaliyyətinə görə həbs edildiyini iddia edirlər. O, musavat.org saytının adminlərindən biri olub. Sosial şəbəkələrdə fəal olub. 

Vəkil Nemət Kərimli onun siyasi fəaliyyətinə görə, həbs edildiyini bildirib: “Hazırda Fərəcin harada olması istiqamətində əlimizdən gələni edirik. Amma hara müraciət ediriksə, cavabsız qalır. Bir insanın saatlarla gizli saxlanılması oğurluqdur. Bu sırf Fərəcin siyasi mövqeyinə görə həbs edildiyinin sübutudur”.