Cavid Qurbanovun imperiyasında yoxlamalar başlayır

Ölkənin ən varlı oliqarxlarından biri sayılan Cavid Qurbanovun rəhbərlik etdiyi "Azəryolservis" ASC ətrafında yeni qalmaqal böyüyür

Əldə etdiyimiz məlumata görə, Cavid Qurbanovun rəhbərlik etdiyi şirkətdə böyük məbləğdə yeyinti olub və vergi auditi "Azəryolservis" ASC rəhbərliyidən son bir ilin hesabatını tələb edib.

Mənbə bildirilir ki, "Azəryolservis" ASC son bir ilin hesabatını əslində tabe olduğu nəqliyyat nazirliyinə belə verməyib. Nazirlikdən bu haqda heç bir məlumat verilməsə də, Cavid Qurbanovun son bir ildə nəinki tabe olduğu nazirliyin şöbə müdürlərini, hətta vergi orqanlarının və hesablama palatasının nümayəndələrini belə "Azəryolservis" ASC-yə yaxın buraxmadığı artıq heç kəs üçün sirr deyil. 

Şirkətin heç bir orqana xərcləri və gəlirləri barədə müfəssəl məlumat verməməsi onun fəaliyyətini gizliləşdirir və "Azəryolservis" ASC-də dövr edən kapital haqqında dəqiq rəqəmlər söyləməyi çətinləşdirir. Amma təxmini hesablamalar nəticəsində ortaya çıxan rəqəmlər, məbləğlər sözün əsl mənasında bu şirkətin yeyinti üçün ən ideal yer olduğunu göstərir.

Yolların tikintisindən tutmuş sonrakı illərdə onun təmiri, baxımı ilə də məşğul olan Səhmdar Cəmiyyət nəinki ölkənin, bütün regionun ən iri təmir-tikinti trestlərimdən biri hesab olunur. "Azəryolservis" ASC Bakıdan tutmuş Azərbaycanın bütün rayonlarında regional bölməsi, texnika bazası daimi və ixtisaslaşmış işçi qüvvəsi olan rentabelli bir şirkətdir. Yolların tikintisindən çox təmirində və baxımında göstərilən şişirdilmiş rəqəmlər kvartalda milyonlara, ildı isə yüz milyonlarla manata çatır. Ortada mənimsənilən bu əqədr pullara baxmayaraq "Azəryolservis" ASC-nin işçilərinin maaşlarında gecikdirmələr davam edir. Texnikanın işlətdiyi yanacağın pulundan tutmuş təmir olunan yol hissəsinin uzunluğuna qədər şişirdilmiş rəqəmlər beşqat, onqat həddinə çatır. Məsələn asfaltın qalınlığı normadan iki dəfə az döşənir və nəticəsində oliqarx Qurbanovun "kassası" ilboyu dolub-daşır.

Əldə etdiyimiz məlumata görə vergi auditi "Azəryolservis" ASC-də baş verənləri yoxlamaq üçün yuxarılardan göstəriş alıb və yaxınarda şirkətin baş ofisi də daxil olmaqla bütün respublika ərazisindəki strukturlarında auditə başlayacaq. Mənbə bildirir ki, əvvəllər müvafiq dövlət qurumlarının, vergi orqanlarının, yerli icra hakimiyyətlərinin nümayəndələrinin ərazisinə daxil ola bilmədikləri "Azəryolservis" ASC və strukturları Cavid Qurbanovun şəxsi nəzarətində yaradılmış mühafuzə dəstələri tərəfindən qorunur.