Osman Xaliyev 2 il öncə vəzifəyə təyin olunubmuş
Bir sıra saytlarda Sahibkarlığın İnkişafı Fondunun İdarə Heyəti sədri vəzifəsinin icrasının müvəqqəti olaraq Osman Xaliyevə həvalə olunduğu qeyd olunub.
Ölkə.Az-ın xəbərinə görə, sözügedən təyinatın yeni olduğu bildirilsə də, sonradan məlum olub ki, iqtisadiyyat naziri Mikayıl Cabbarovun əmri 2 il öncəyə aiddir. Lakin bu əmrlə O. Xaliyevin İdarə Heyətinin sədri vəzifəsini müvəqqəti icra etməsilə bağlı deyil, sədr təyin olunması ilə bağlı qərar verilib.
Onun bu təyinatadək həmin qurumda İdarə Heyəti sədrinin müşaviri və müavini vəzifəsində çalışdığı qeyd edilib.
Osman Xaliyev 1985-ci ildə Sumqayıt şəhərində anadan olub.
2007-ci ildə Azərbaycan Dövlət İqtisad Universitetini "İqtisadi kibernetika” ixtisası üzrə bakalavr, 2010-cu ildə isə "İdarəetmənin informasiya texnologiyası” üzrə magistratura pilləsini bitirib. 2012-2014-cü illərdə ABŞ-ın Brandeis Universitetində MBA ixtisası üzrə təhsil alıb.
O.Xaliyev 2010-2012-ci illərdə Access Bank QSC-də əməliyyatlar üzrə mütəxəssis, Azərbaycan Respublikasının Mərkəzi Bankında mütəxəssis olaraq fəaliyyət göstərib. 2014-2015-ci illərdə ABŞ-ın Boston şəhərində yerləşən "Global Atlantic Partners LLC” şirkətində məsləhətçi vəzifəsində çalışıb.
2016-2020-ci illərdə kənd təsərrüfatı və qida sənayesi sahələrində fəaliyyət göstərən bir sıra şirkətlərdə biznesin inkişafı üzrə menecer və direktor vəzifələrini icra edib.
