TDT-nin beynəlxalq güc mərkəzi kimi formalaşması yeni düzənin reallığıdır - AÇIQLAMA
"Azərbaycanın yerləşdiyi coğrafiya türk dünyasının daha sıx birliyinin yaranmasında açar və qapı rolunu oynadığından Bakı-Ankara əlaqələrinin dərinləşməsi bütövlükdə türk dünyası üçün çox mühüm əhəmiyyət kəsb edir. Bu baxımdan Azərbaycan Prezidentinin seçkidən sonra ilk rəsmi səfərini Türkiyəyə etməsi türk dünyasının sıx birliyinin yaranmasına ciddi töhfəsini verəcək".
Bunu Ölkə.Az-a açıqlamasında deputat İltizam Yusifov deyib.
Onun sözlərinə görə, cənab Prezident fevralın 14-də andiçmə mərasimində növbəti mərhələdə Azərbaycanın gələcək inkişaf hədəflərini açıqlayarkən bəyan etdi ki, xarici siyasətin ana xəttini türk dövlətlərinin yeni mütəşəkkil güc mərkəzi kimi formalaşıdırılması olacaq. "Prezident İlham Əliyevin Ankaraya səfəri türk birliyinin dünyada yeni bir güc mərkəzi kimi formalaşmasında ciddi addım idi. Çünki Türkiyə Prezidenti Rəcəb Tayyib Ərdoğanla keçirilən görüşdə müzakirə edilən əsas məsələlərdən biri məhz türk dünyasının sıx birliyinin və əməkdaşlığının yaradılması məsələləri oldu", - o qeyd edib.
Deputat əlavə edib ki, iki qardaş ölkə görüşdən sonra verdikləri bəyanatda da bunu açıq şəkildə bəyan etdilər:
"Azərbaycan Prezidenti bəyan etdi ki, bütün məsələlərdə bir yerdəyik, bir nöqtəyə vururuq. "Biz öz gücümüzə güc qatırıq. Təbii ki, türk dünyasının birləşməsi, ortaq köklərə sahib olan xalqların bir arada olması Türk Dövlətləri Təşkilatının hər bir üzvünü gücləndirəcək. Bu gün bu məsələ ilə bağlı geniş müzakirə aparılıb. TDT-nin Şuşada keçiriləcək qeyri-rəsmi Zirvə görüşü Türk xalqlarının birliyi işinə növbəti güclü təkan verəcək" - cənab İlham Əliyev bəyan etdi.
Artıq TDT-nin siyasi, iqtisadi və hərbi cəhətdən mütəşəkkil bir beynəlxalq güc kimi formalaşması, yeni düzəninin reallıq və qarşısıalınmaz bir prosesdir. Əminəm ki, ən qısa zamanda türk dünyasının güclü bir təşkilat kimi ortaya çıxması ilə bağlı qarşıya qoyulan hədəflərə nail olunacaq. Ankarada Azərbaycan və Türkiyə liderlərinin görüşündə keçirilən görüşlər bunu deməyə əsas verir. Cənab İlham Əliyevin bəyan etdiyi kimi, Türkiyə-Azərbaycan birliyi təkcə bölgə və yaxud türk dünyası üçün deyil, Avrasiya coğrafiyası üçün önəmli amilə çevrilib. Çünki bu birlik Avrasiya coğrafiyasında yerləşən ölkələrin əməkdaşlığı üçün yeni fürsətlər açır. Bu birlik bölgədə dayanıqlı sülhün, sabitliyin, təhlükəsizliyin təmin olunmasına böyük töhfə verəcək. Nəticədə türk birliyi Qərblə Şərq arasında etibarlı bir bağlantı və əməkdaşlıq rolunu oynayacaq. Bu missiyanın da ağırlığı əsasən Azərbaycanla Türkiyənin üzərinə düşür. Əminəm ki, Azərbaycan və Türkiyə bu missiyanın öhdəsindən uğurla gələcək. Bunun üçün iki ölkə arasında hərtərəfli əlaqələr daha da dərinləşdirilməlidir. Təbii ki, birliyimizi istəməyən qüvvələrin bu yolda bizlərə qarşı ən müxtəlif formada çirkin, məkrli planları olacaq və çətinliklər yaradılacaq. Biz həmrəyliyimiz və birliyimiz nəticəsində bütün bu çətinlikləri aşıb qarşıdakı hədəflərə nail olunacağıq. Düzgün müəyyən edilmiş siyasət nəticəsində indiyədək olduğu kimi, bundan sonra da düşmənlərimizin çirkin niyyətləri iflasa uğradılacaq".
Mürtəza
Ölkə.Az
