İqbal Ağazadə jurnalistləri təbrik etdi
Ümid Partiyasının sədri, millət vəkili İqbal Ağazadə 22 iyul - Milli Mətbuat Günü münasibəti ilə Azərbaycan jurnalistlərini təbrik edib
Olke.az-ın məlumatına görə, İ.Ağazadə təbrikində Azərbaycan mətbuatının keşməkeşli yollardan keçdiyini bildirib:
"Əsası Həsənbəy Zərdabi tərəfindən qoyulmuş Azərbaycanın milli mətbuatının yaranmasından 139 il ötür. Bu müddət ərzində Azərbaycan mətbuatı keşməkeşli bir tarix yaşayıb, ağır sınaqlardan keçib. Azərbaycanın ikinci müstəqillik tarixində də gərgin mərhələlərin birgə şahidi olmuşuq. Birinci Qarabağ savaşı, demokratiya uğrunda mübarizə, keçid dövrü və digər mərhələlərdə, proseslərdə jurnalistlər, mətbuat işçiləri də çətin və şərəfli bir missiya daşıyıblar.
Bütün dövrlərdə jurnalistlər peşə borcunu yerinə yetirərkən dövlətimizin və millətimizin maraqlarını qorumağa çalışmış, Qarabağ həqiqətlərinin dünyaya çatdırılmasında, ölkədə insan haqlarının qorunması və demokratikləşmə uğrunda mübarizədə əvəzsiz rol oynamış, Azərbaycanın imicinin yüksəldilməsi üçün əllərindən gələni ediblər. Təəssüflər olsun ki, bu gün Azərbaycan mətbuatı da problemlərdən uzaq deyil, azad və müstəqil mətbuat hələ də formalaşmayıb".
Partiya olaraq jurnalistlərin normal fəaliyyətinə şərait yaradılması üçün əllərindən gələni etdiklərini bildirən İ.Ağazadə, bununla bağlı parlamentdə də məsələ qaldırdığını vurğulayıb:
"Biz Ümid Partiyası olaraq bu problemlərin aradan qaldırılması, jurnalistlərin normal fəaliyyətinə şərait yaradılması üçün əlimizdən gələni etmişik və edəcəyik. Bununla bağlı ölkə rəhbərliyinə müraciətlərimiz olub, parlamentdəki çıxışlarımız zamanı dəfələrlə məsələ qaldırmışıq. Hesab edirik ki, mətbuatın problemləri dövlət səviyyəsində həll edilməlidir.
Eyni zamanda bütün bu çətinliklər qarşısında Azərbaycan jurnalistikasının əzmkarlığının şahidi olmuşuq.
Biz bu şərəfli yolda, böyük və yenilməz Azərbaycan uğrunda mübarizədə sizə uğurlar arzu edirik. Tanrı sizə yar olsun!".
Qeyd edək ki, 22 iyul Azərbaycanda Mətbuat Günü kimi qeyd olunur. 1875-ci ilin məhz bu günündə Həsən bəy Zərdabi "Əkinçi" qəzetinin nəşrinə başlayıb.
Olke.az
