“Karantinli şəhər” dedik, qəzəbləndilər: gözdən uzaqda qalan rayonlarımız - VİDEO - FOTO

Bu il də bir həftəlik əfsanəvi şəhər bildiyim Şəkidə istirahət hüququ qazandım. Təbii ki, söhbət məzuniyyətdən gedir. Şişirtmirəm, tarixi Nuxanın harasına getsən, istirahət etmək üçün özəl məkanından tutmuş ta təbiətin yaratdığı mənzərəyə qədər hər şey əlçatandır. Amma çalışdım ki, bu dəfə fərqli nəsə edim. Şəkinin yaxınlığında yerləşən şəhər və rayonlara səfər etdim.

Qaxdan çox danışılırdı, gedənlər həmişə yaxşı sözlər deyirdi, amma çox qabardılmırdı. Yəni Qəbələ, Quba, Qusar, Şəki və s. kimi adı hallanmır. Sanki gözdən uzaqda qalıb. Odur ki, elə Şəkidən çıxarkən naviqatorda İlisu ərazisini seçib yola çıxdıq. Məşhur şəlaləni niyyət etmişdik ki, yolüstü Ulukörpü adlanan turistik məkana yetişdik. Buranın mənzərəsi adama “gəl-gəl” deyirdi, dağın ətəyində olan tarixi körpüdən ibarət olan yerdə yaxşıca şəkillər çəkə bilərsiniz. Həm də körpünün altından axan çayın şırıltısını dinləməklə də zövq alıb hüzur tapa bilərsiniz.

@samirm_252 #qaxşəhəri #qaxşeheri #azerbaycan?? #vlog ♬ оригинальный звук - Alexander Cardinal

Növbəti dayanacağımız qala şəhərciyi oldu. Sözün əsl mənasında qala idi. Müasir dövrdə tarixi məkan tikilib. Xatirə qalacaq şəkillər çəkmək üçün uyğun məkandır.

Daha sonra məşhur İlisu (Ramramay) şəlaləsi ərazisinə çatdıq. Şəlalə axan yerə getmək isə o qədər də asan olmadı. Maşınla oraya qalxmağa cəhd göstərsək də, mümkün olmadı. Mini ciplə idik, amma yenə də alınmadı. “Niva”, “UAZ” kimi avtomobillərlə ödəniş qarşılığında (20 manat) getdik. Piyada da qalxmaq mümkündür. Səfər isə olduqca həyəcanlı və adrenalinli alındı. Getməyə dəyər…

Ardınca isə fərqli istiqamətdə olan Mamırlı şəlaləyə getdik. Buranın da yolları daş-kəsəklidir. Altı alçaq olan maşınlarla əraziyə çox da yaxınlaşmaq olmur. Yolun əhəmiyyətli hissəni isə piyada getməlisiniz. Özü də yoxuşa doğru, yəni hündürlüyə qalxaraq. O qədər qalxırsan ki, yolun bitməyəcəyini düşünürsən, o qədər səbirsizlənirsən ki, geriyə qayıdanlardan soruşursan: “nə qədər qalıb, qardaş?” Onlar isə müjdəni verirlər: “Az qalıb, demək olar, çatmısınız”.

Nəhayət, gəlib çıxırıq o möhtəşəm şəlaləyə. Açığını deyim ki, arzulanan məkana çatan zaman bir anlıq beynimdən keçdi ki, “biz buna görə belə əziyyət çəkdik?!” Arxasınca samovar çayı içəndən sonra yaxşıca dincimizi aldıq və şəlalədən zövq aldıq. Geriyə dönəndə isə yol o qədər qısa gəldi ki, sanki az öncə güc-bəlayla gəlməmişdik.

Zaqatalaya səfərimiz də fərqli mənada yaddaqalan oldu. Şəhərin girəcəyində “zapravka”dan görməli yerləri soruşduq, yalnız Qəbizdərəni göstərdilər. Ümumiyyətlə, kimdən nəsə öyrənməyə çalışdıq, eyni ünvanı və parkları tövsiyə etdilər. Mən əlimdən nə qədər gəldisə, maksimum soraqladım, hətta zənglə Zaqatalada qalan bir nəfərdən məlumat almaq istədik, eyni tövsiyədə bulundu. Odur ki, yazacaqlarım qərəzli görünməsin. 

@samirm_252 Zaqatalada çox maraqlı turizm məkanları inşa etmək olar. Olduqca soyuq bir şəhər təəssüratı bağışladı. #zaqatala #azerbaycan #fyp ♬ Waiting For Heartache - BLVKSHP

Əvvəlcə deyim ki, şəhər çox səssiz və insansız idi. Ən çox adam mərkəzi hissələrdə görünürdü. Orada isə mərkəzi və qaynar yerlərdəki sıxlıq kimi deyildi. Sanki şəhərdə karantin vəziyyəti elan olunmuşdu. Soyuqluq vardı. Videosunu çəkib paylaşmışam, amma bəzi yerli sakinlər mənimlə razılaşmadılar, hətta qəzəbli reaksiya verənlər də oldu. Görünür, daha çox əziyyət çəkməli və ya artıqlaması ilə hazırlıqlı getməli idim. İş təkcə bizim diribaşlığımızdan getmir, şəhərin müxtəlif yerlərində turistik məkanlara yönəldən məlumat lövhələri olmalıdır. Bu, qonaqların istirahəti arzulanan səviyyədə keçirməsi üçün şərtdir. Üstəlik, belə turizm imkanları böyük olan şəhərdə olduqca iri işlər görmək olar. 

Deməli, deyilən məşhur Qəbizdərəyə yollandıq, yol o qədər enişli idi ki, iki nəfərdən soruşandan sonra maşının ilişib qalmaq qorxusundan qurtulduq. Amma yenə də əmin deyildik. Çatdıq və məlum oldu ki, sadəcə, piknik üçün yaşıllıq və xoş səfası olan meşəlik məkandır. Şəki və Qaxdan sonra belə ərazi insana adi gəlir. 

İnsanlar yaxınlıqdakı çaydan selin gətirdiyi odun parçalarını yığıb manqal üçün istifadə edirdi. İstirahət məkanının çaya yaxın hissəsi tullantılarla dolu idi, çünki ərazidə zibilqabı gözə dəymirdi. Bəziləri isə zibili özü ilə aparırdı.

Soraqladığımızdan sonra yön aldığımız Car kəndində də fərqli məkanlarla rastlaşmadıq. Şəhərə gələn qonaqlardan biri məndən ünvan soruşdu, mən də oxşar münasibət göstərdim. Bircə dənə “Gələrsən Görərsən” adlı yerdə ağacın gövdəsində quraşdırılmış masada iki çaynik yorğunluq çayı içdik. Cəmi 4 manat ödədik. 

Zaqatala səfərim uğursuz olduğu üçün yenidən Qaxa qayıdıb Bakının İçərişəhərinə bənzəyən İçəri bazarında olduq. Əhvalımızı normallaşdırıb Şəkiyə qayıtdıq.

Səfərimizi sanki kompensasiya etmək üçün Ördək göl adlanan istirahət yerinə yollandıq. Sonradan bildim ki, sən demə, Şəkinin hələ də kəşf etmədiyimiz yerləri varmış. 

Növbəti dəfə həm Şəkidən, həm də Zaqataladan yeni və xoş təəssüratlarla, videolarla dönmək ümidi ilə…

Samir Mirzə

@samirm_252 Küçənin maraqlı tarixçəsi var. Burada yerli sakinlər yaşayır. Əvvəllər ermənilər də küçədə məskunlaşıb. Olduqca müsbət enerji verir adama. #kesfet #azerbaycan #fyp ♬ France Accordion Swing - MIZUSATO Masaki