10 yaşlı informasiya agentliyinin yeni planları var

Oktyabrın 27-də “Report” İnformasiya Agentliyinin (İA) 10 yaşı tamam olur. Media mühitində mötəbər xəbər mənbələrindən biri sayılan agentlik gündəlik olaraq ən son yenilikləri, ölkə və dünya gündəmində baş verən hadisələri oxucuların diqqətinə çatdırır. “Global Media Group” holdinqin tərkibində fəaliyyət göstərən agentlik üç dildə (Azərbaycan, rus və ingilis) xəbər yayır. İnternet ünvanı Report.az-dır. Agentlik kütləvi oxucu auditoriyasını dəqiq və dürüst xəbərlərlə təmin etməyi qarşısına əsas məqsəd qoyub. “Report” İA ötən illər ərzində mövcudluğunu qoruyub saxlamaqla yanaşı, populyarlığını da artıraraq media məkanında irəliləyib. Alternativ media resurslarının yarandığı bir şəraitdə bazarda 10 illik mövqeyini qoruyub saxlayan agentliyin gündəlik iş prosesini işıqlandırmaq üçün AZƏRTAC olaraq həmkarlarımızın qapısını döydük.

Qapıdan içəri daxil olduğumuz andan etibarən qızğın iş prosesinin, əməkdaşların öz sahəsi ilə bağlı xəbərləri izlədiyinin şahidi olduq. Bizi qarşılayan agentliyin direktoru Fuad Hüseynəliyevlə onun rəhbərlik etdiyi dövrdən etibarən “Report”da baş verən yeniliklər və cari planlar ətrafında həmsöhbət olduq.

Direktor “Report”un artıq 10 ildir informasiya bazarında öz yerini tutduğunu bildirərək qeyd etdi ki, əvvəllər olduğu kimi, son illər də agentlik mövqeyini daha da möhkəmləndirərək irəliyə getməyə çalışıb. Hazırda “Report”un Azərbaycan, rus və ingilis dillərində ümumi olaraq gündəlik 600-700 xəbər istehsal etdiyini deyən direktor agentliyin sosial şəbəkə hesablarının da kifayət qədər aktiv olduğunu vurğulayıb:

“Xəbərlərimizi sosial şəbəkələr vasitəsilə 10 milyondan artıq izləyiciyə çatdırırıq. “Report” İnformasiya Agentliyinin əsas məqsədi və məramı cəmiyyətə doğru və dürüst xəbərləri çatdırmaqdır. Belə ki, agentlikdə yoxlanılmamış xəbərlər yayımlanmır. Məlumdur ki, hazırda dezinformasiya və feyk xəbərlər dövründə yaşayırıq. Biz çalışırıq ki, bütün informasiyaları bir neçə mənbədən dəqiqləşdirəndən sonra oxucuya təqdim edək. Hazırda bunun özü çətin prosesdir. Bilirsiniz ki, sosial şəbəkələrin aktiv olduğu dövrdə yaşayırıq. Bunu nəzərə alaraq operativliyimizi də qorumalıyıq. Hesab edirəm ki, biz öz məqsədlərimizə nail oluruq. Belə ki, “Report”un xəbərlərinə kifayət qədər çox istinadlar var. Biz bunu digər saytları izlədikdə də müşahidə edirik. Bu, onun göstəricisidir ki, digər xəbər saytlarında çalışan həmkarlarımız da bizim xəbərlərə etibar edirlər”.

Agentliyin fəaliyyəti ilə bağlı gələcək planlardan danışan F.Hüseynəliyev əsas məqsədlərinin beynəlxalq bazara çıxmaq olduğunu vurğulayıb. O bildirib ki, Azərbaycan haqqında xəbərlərin digər ölkələrin agentliklərində və xəbər portallarında “Report”un adı ilə verilməsinə nail olmaq istəyirlər:

“Bu məqsədimizə demək olar ki, nail oluruq. Rusiya, Ukrayna, Mərkəzi Asiya dövlətlərinin xəbər agentlikləri, portalları artıq “Report”a istinad edir. Avropa ölkələrinin xəbər saytlarında da agentliyin xəbərlərinə istinad edilməsi faktına tez-tez rast gəlirik. Çalışırıq ki, bu miqyası daha da genişləndirək, Azərbaycanın nailiyyətləri, onun keçdiyi inkişaf yolu, ölkəmizdə keçirilən dünya əhəmiyyətli tədbirlər, məsələn, COP29 kimi mötəbər tədbirin məlumatları Report.az-a istinadla dünya mediasında yayımlansın”.

“Report”da hazırda kifayət qədər peşəkar komandanın formalaşdığını qeyd edən direktor hazırda agentlikdə 100-dən artıq əməkdaşın çalışdığını qeyd edib. Bu heyətə müxbirlər, redaktorlar, tərcüməçilər, sosial media bölməsinin əməkdaşları və digər işçilər aiddir:

“Report”un bir özəlliyi də ondan ibarətdir ki, agentliyin tərkibində 2018-ci ildən etibarən Report Media Məktəbi fəaliyyət göstərir. Artıq 17 qrup tələbə bu məktəbin məzunu olub. Bu yaxınlarda 18-ci qrupun tədrisi prosesinə başlamışıq. Bizim məzunların bir çoxu hazırda jurnalist olaraq fəaliyyətini davam etdirirlər. Bundan başqa, media məktəbinin 10 məzunu hazırda “Report”un işçiləridir. Məzunlarımızın əksəriyyətini daha çox agentliyimizdə işə götürmüşük, sadəcə olaraq, hansısa mərhələdə onlar “Report”la yollarını ayırıb və hazırda müxtəlif yerlərdə çalışırlar”.

Agentliyin baş redaktoru Murad Əliyev də ötən 10 il ərzində “Report”un media məkanında özünü təsdiq etdiyini vurğulayıb. Bu illər ərzində agentliyin formalaşmış xəbər siyasətinin olduğunu bildirən baş redaktor təmsil etdiyi media subyektinin istər ölkədaxili, istərsə də ölkə xaricində baş verən hadisələrə dərhal reaksiya verdiyini söyləyib. O bildirib ki, “Report” İnformasiya Agentliyi yarandığı ilk gündən dəqiq məlumatlara əsaslanmış xəbərlər hazırlayıb:

“Hər hansı hadisəni rəsmi mənbələrdən təsdiqlətmədən yayımlamırıq. Məhz bu məsələyə görə də “Report” oxucular arasından öz auditoriyasını toplaya bilib. “Report” digər saytlar üçün etibarlı xəbər mənbəyi kimi formalaşıb. Hətta bəzi oxucular digər saytlarda yayımlanmış xəbərlərin doğru olub-olmadığını öyrənmək üçün bizim sayta baxırlar. Digər tərəfdən, “Report” İnformasiya Agentliyində hər sahə üzrə ixtisaslaşmış kadrlar mövcuddur. Bu da bizə həmin sahələr üzrə peşəkar xəbərlər hazırlamağa imkan yaradır”.

Yerli mətbuatın agentliyin xəbərlərini istinadla dərc etdiyini bildirən baş redaktor əməkdaşların öz işinə sevgi və məsuliyyətlə yanaşmasının uğurun bir nömrəli açarı olduğunu vurğulayıb:

“Bir müddət mətbuatda çalışan əməkdaşların bir çoxu “Report”da işləmək istəyirdilər. Çünki burada bir ailə mühiti, əməkdaşlara qarşı xoş münasibət var. Hesab edirəm ki, əgər redaksiya daxilində sağlam mühit formalaşırsa, bu, istər-istəməz xəbərlərə və oxuculara da sirayət edir, belə olduqda oxucu həmin sayta daha çox etibar edir”.

Özü gənc olsa da, “Report”un “qocaman”larından sayılan Samirə Abdullayeva burada müxbir kimi fəaliyyətə başlayıb, hazırda redaktor vəzifəsini tutur. Ona həvalə edilən postun məsuliyyətli iş olduğunu bildirən redaktor cavabdeh olduğu sosial sahə üzrə xəbərlərin oxunaqlı olmasından danışıb. “Report” həmişə istinad mənbəyi olub. Ona görə də bu, bizim məsuliyyətimizi daha da artırıb. Çalışırıq ki, dəqiq, operativ, qərəzsiz informasiyalar dərc edərək oxucuların bizə qarşı olan inamını qoruyub saxlayaq. Bundan əlavə, çalışırıq ki, rəsmi şəxslərdən müsahibələr təşkil edək, maraqlı, oxunaqlı xəbərlər əldə edək.

Qeyd edim ki, agentlikdə evdə olduğumuz vaxtdan daha çox zaman keçiririk. Kollektivin əməkdaşları ilə uzun müddətdir birgə çalışdığımız üçün bir-birimizlə çox yaxşı dil tapa bilirik”, - deyə S.Abdullayeva bildirib.

“Report”da 9 ildir çalışan İqtisadiyyat xəbərləri şöbəsinin redaktoru Namiq Hüseynov da iqtisadi sahədə aktual olan xəbərləri həmişə diqqətdə saxladıqlarını bildirib:

“Eyni zamanda, gün ərzində iqtisadi sahə ilə bağlı maraqlı açıqlamalar olarsa, onları da gözdən qaçırmamağa çalışırıq. Ola bilər ki, biz gün ərzində 30-40 və ya 70-yə yaxın xəbər yayımlayaq. Bu, ölkədə iqtisadi sahədə gündəlik baş verən aktivlikdən asılıdır. Böyük tədbirlər keçirilən zaman iqtisadi xəbərlərin sayı çox olur. Eyni zamanda, agentlikdə iqtisadi qurumların aylıq, rüblük hesabatları da dərc olunur. Mən bura gələndə agentlik il yarım idi ki, fəaliyyət göstərirdi. O zaman “Report”un məqsədi daha çox tanınmaq idi. Bu illər ərzində “Report” böyük bir inkişaf yolu keçib. Artıq ictimaiyyət arasında bir fikir formalaşıb ki, xəbəri “Report” yayıbsa, demək ki, düzdür. Sevinirəm ki, bu inkişafda və agentliyin tanınmasında mənim də az da olsa rolum var”.

“Report” İnformasiya Agentliyinə qədəm qoyduğu yeni yaşında da oxucularının etimadını qoruyub saxlamağı və yeni yaradıcılıq uğurları arzulayırıq!