Din aborta hansı hallarda icazə verir?
Son illər Azərbaycanda doğulan qız uşaqlarının sayı kəskin şəkildə aşağı düşüb.
Ötən ilin göstəricilərinə nəzər salanda mənzərə açıq-aşkar görünür. 2014-cü ilin statistikasına görə, ölkəmizdə dünyaya gələn oğlan və qız uşaqlarının say nisbəti son 20 il ərzində normal göstərici səviyyəsindən xeyli yüksəkdir. Məsələn, normalda bu göstərici hər 100 nəfər qız uşağına 103-106 oğlan uşağıdırsa, Azərbaycanda 120-124-dür. Şübhəsiz ki, vəziyyətin belə kritik həddə gəlib çatmasında abortların xüsusi rolu vardır. Belə ki, adətən ailələr ailədə ikinci qız uşağının dünyaya gəlməməsi üçün onu tələf etdirirlər. Bəs dinimizdə bu cinayətin cəzası nədir və hansı hallarda abort etdirmək olar?
İlahiyyatçı Elşad Miri Ölkə.az-a açıqlamasında bildirib ki, abort yalnız həkimin rəyinə görə günah sayılmaya bilər:
"İslam dinində bildirilir ki, ana bətnindəki uşağı məhv etmək diri inanı öldürmək kimidir, cinayətdir. Əgər həkim rəy versə ki, uşağın qalması ananın həyatı üçün təhlükəlidir, o zaman ananın sağ qalması üçün uşaq tələf edilə bilər. Bunu nəinki törədən, törədilməsinə vasitəçi olan insanlar da cinayətdə iştirak etmiş şəxslər hesab olunur".
Bəs körpənin cinsiyyəti bəlli olandan sonra edilən abortla, cinsiyyəti bəlli olanadək edilən abortun nə kimi fərqi var və hansının cəzası daha böyükdür? İlahiyyatçı bildirir ki, burada heç bir fərq qoyulmur:
"Bir insan bir insanı öldürəndə baxmırlar ki,öldürdüyü qadındır, ya kişidir. Cinayət törənibsə, bir canlını məhv edibsə, eyni cəzadır. Dində də belədir. Əgər elə bir şey olsa, bu, diskriminasiya olardı. Halbuki Peyğəmbərimiz həmin dövrdə cəmiyyətdə qız uşaqları ilə bağlı yanlış fikirləri aradan qaldırmaqdan ötrü qız uşaqlarına daha çox üstünlük verilməsinə tərəfdar idi. Qeyd edirdi ki,üç qız böyüdənlə birlikdə (Cənnətdə) olacağıq. Peyğəmbərimzin nəsli məhz qız uşaqları vasitəsilə davam etdirilib. "Qurani Kərim"də də buyurulur ki, uşağın cinsiyyətini deməzlər. Çünki burada əsas kimi onun saleh, xeyirli övlad olması götürülür".
İntiqam VALEHOĞLU
Ölkə.az
