“Bu gün adının mənasını düşünən şagird sabah düzgün ad seçəcək”
“Prezident İlham Əliyev 2025-ci ildə AMEA-nın 80 illik yubiley yığıncağında ana dilinin saflığının qorunması məsələsini strateji vəzifə olaraq müəyyənləşdirdi, “hər bir millət, hər bir xalq üçün onun ana dili onun milli mənsubiyyətinin əsas amilidir və bu istiqamətdə bütün ictimai fəallar, bütün ictimaiyyət bir nöqtəyə vurmalıdır” fikri ilə cəmiyyəti bu mövzuda ictimai səfərbərliyə çağırdı”.
Ölkə.az xəbər verir ki, bunu Azərbaycan Milli QHT Forumunun İdarə Heyətinin sədri Ramil İskəndərli bəyan edib.
O, deyib ki, Azərbaycan QHT-lərinin çətir təşkilatı olan Azərbaycan Milli QHT Forumu ana dilinin saflığının qorunması mövzusunda QHT-lərlə silsilə ictimai müzakirələr təşkil edir:
“Bu xüsusda 2026-cı ilin aprelində “Yeni doğulan uşaqlara qoyulan adlar və milli kimlik” mövzusunda keçirilən ictimai müzakirə zamanı Forum üzvləri Elm və Təhsil Nazirliyi tərəfindən 2026-2027-ci tədris ilində şagirdlər arasında “Mənim adımın mənası nədir?” mövzusunda ümumrespublika inşa müsabiqəsinin keçirilməsi təşəbbüsü ilə çıxış edib. Hesab edirik ki, uşağa verilən ad yalnız fərdi zövq məsələsi deyil, eyni zamanda kollektiv yaddaşın, mədəni kodların və milli kimliyin mühüm daşıyıcısıdır. Bu mənada gələcək valideynlər – məktəblilər arasında belə bir müsabiqənin təşkili uşaqların öz adlarının mənasını araşdırmasına, bu prosesə ailə üzvlərini cəlb etməsinə və ümumilikdə cəmiyyətin diqqətinin milli ad ənənələrinə yönəldilməsinə böyük töhfə verə bilər”.
Azərbaycan Milli QHT Forumunun İdarə Heyətinin sədri bildirib ki, bu barədə Elm və Təhsil Nazirliyinə rəsmi müraciət ediblər, vətəndaş cəmiyyətinin təşəbbüsü Nazirlik tərəfindən dəstəklənib:
“Bu mühüm məsələdə çevik reaksiyasına görə Elm və Təhsil Nazirliyinə təşəkkür edirik. Bizə verilən məlumata görə, 2026-ci ilin sentyabr-dekabr ayları ərzində orta ümumtəhsil məktəblərində V–VII sinif şagirdləri arasında “Mənim adımın mənası nədir?” mövzusunda məktəb səviyyəli inşa müsabiqəsi elan olunacaq. Hər bir məktəb öz qalibini müəyyən edəcək. Bu müsabiqə ana dilinin saflığının qorunması istiqamətində aparılan dövlət siyasətinə və ictimai təşəbbüslərə dəstək deməkdir, şagirdlərdə milli kimlik, adların mənəvi və mədəni mahiyyəti barədə dərin düşüncə formalaşdırmağa, həmçinin ailə və cəmiyyət daxilində milli dəyərlərə bağlılığı gücləndirməyə kömək edəcək. Bu gün adının mənası barədə düşünən şagird sabah valideyn kimi övladına düzgün ad seçəcək”.
Ramil İskəndərlinin sözlərinə görə, uşaqların rəqəmsal mühitdə təhlükəsizliyinin qorunması da ciddi məsələdir. Yaxın günlərdə Azərbaycan Milli QHT Forumu “Uşaqların rəqəmsal təhlükəsizliyi, zərərli asılılıqdan qorunması” mövzusunda QHT-lərin iştirakı ilə növbəti ictimai dinləməsini keçirəcək.(qafqazinfo)
