Bu yay bağ evi kirayələmək neçəyə başa gələcək?
Yay mövsümünün başlaması ilə şəhərin səs-küyündən uzaqlaşıb istirahət etmək istəyənlərin sayı artır. Xüsusilə bağ evlərinə tələbatın yüksəlməsi bazarda qiymətlərin necə dəyişəcəyi ilə bağlı sualları da gündəmə gətirir. Bəs yay aylarında bağ evlərinin kirayə və satış qiymətlərində artım gözlənilirmi?
Mövzu ilə bağlı Ölkə.az-a danışan Azərbaycan Qiymətləndiricilər Cəmiyyətinin sədri Vüqar Oruc bildirib ki, hər il bağ mövsümündə adətən aprel ayından başlayaraq qiymət artımı özünü göstərir:
"Xüsusilə də kirayə qiymətlərində bu artım hiss olunur. Satış qiymətlərinə gəldikdə isə, əgər evlər yeni tikilibsə, həmin evlər təbii ki, daha yüksək xərcə başa gəlir. Çünki inşaat materialları, işçilik və digər xərclər hazırda bir il əvvəlkindən daha çoxdur və bu da yeni inşa edilmiş bağ evlərinin bazara daha yüksək qiymətlə təklif olunmasına gətirib çıxarır.
Amma alıcılıq hazırda aktiv olmadığı, bazar kifayət qədər dinamik olmadığı üçün köhnə tikililər, yəni bağ evləri bazara o qədər də yüksək qiymətlə təklif olunmur. Hətta burada daha aşağı qiymətlərə də rast gəlmək olur.
Burada əsas vurğu kirayə qiymətlərinə qoyulmalıdır. Çünki keçən il qiymətlər üç min manatdan səkkiz min manatadək dəyişirdisə, bu il dörd min manatdan on min manatadək dəyişir. Tam infrastruktura malik, istirahət üçün tennis kortu, futbol meydançası, hovuzu, həm yaşayış, həm də istirahət üçün müvafiq şəraiti olan bağ evləri hazırda bazarda çox yüksək qiymətlə təklif olunur".
"Ötən illə müqayisədə kirayə qiymətləri təxminən 20-25 faiz artıma məruz qalıb. Amma satış qiymətlərində artım təqribən 10-12 faizdir. Burada söhbət yeni tikililərdən, yeni tikilən və inşa olunan bağ evlərindən gedir.
Bundan sonrakı dövrdə artım necə ola bilər? Mən düşünmürəm ki, ciddi artım baş versin. Çünki onsuz da qiymətlər artıq yüksəlib. Amma bazarda qıtlıq yaranarsa və ya müəyyən problemlər ortaya çıxarsa, 3-5 faizdən artıq artım gözləmirəm. Yəni, təqribən desək, kirayə qiymətləri 5-10 faiz civarında arta bilər. Satış qiymətləri isə təxminən 5 faiz civarında artıma məruz qala bilər", - deyə V.Oruc sonda qeyd edib.
Həmidə İbrahimova
