Azərbaycan da bunu qadağan edə bilərmi?

Bəzi ölkələrdə, o cümlədən İspaniya və Fransa çimərliklərdə siqaret çəkilməsi qadağandır. İndi isə Türkiyədə bu təcrübə tətbiq olunacaq. Ölkənin turizm bölgəsi olan Antalyanın Lara, Belek, Çamyuva və Çimərlik Parkı çimərliklərində tütündən istifadəyə məhdudiyyət qoyulub.

Bəs Azərbaycanda da çimərliklərdə siqaret çəkilməsinə qadağa qoyula bilərmi?

Ölkə.az xəbər verir ki, hüquqşunas Ramil Süleymanov “Yeni Sabah”a açıqlamasında bildirib ki, hazırda ölkədə çimərliklərdə tətbiq olunan məhdudiyyətlər məsafə, dərinlik və təmizliklə bağlıdır.

Onun sözlərinə görə, çimərlik ərazilərində sanitar vəziyyətin qorunması və vətəndaşların təmizlik qaydalarına riayət etməsi İnzibati Xətalar Məcəlləsi ilə tənzimlənir:

“Bu sahə üzrə nəzarəti həyata keçirən aidiyyəti qurumlar mövcuddur. Dərinlik və təhlükəsizlik məsələlərinə birbaşa Fövqəladə Hallar Nazirliyinin Dövlət Sularda Xilasetmə Xidməti nəzarət edir. Həmin istiqamətdə baş verən qayda pozuntularına görə tədbir görmək məsuliyyəti müvafiq qurumun səlahiyyətlərinə daxildir. Çimərlik ərazilərində sanitar vəziyyətin qorunması və vətəndaşların təmizlik qaydalarına riayət etməsi isə İnzibati Xətalar Məcəlləsi ilə tənzimlənir. Vətəndaşlar tərəfindən çimərlik ərazilərinə məişət tullantılarının atılması, eləcə də sahibkarlar tərəfindən ətraf mühitin çirkləndirilməsi ilə bağlı qanunvericilikdə inzibati məsuliyyət nəzərdə tutulub”.

R.Süleymanov xatırladıb ki, İnzibati Xətalar Məcəlləsinin 212.1-ci maddəsinə əsasən, tütün məmulatlarından istifadənin məhdudlaşdırılması haqqında qanunla qadağan olunmuş ərazilərdə siqaret çəkən fiziki şəxslər 30 manat məbləğində cərimə edilirlər:

“Bu qadağa çimərlik ərazisində də tətbiq oluna bilər. Əgər ərazidə müvafiq qadağanedici nişan yerləşdirilibsə və şəxs buna baxmayaraq siqaret çəkirsə, 30 manat məbləğində cərimə ödəməlidir. Bundan əlavə, məişət tullantılarının urnalardan və ya zibil qablarından kənara atılmasına görə fiziki şəxslər 300 manat, vəzifəli şəxslər 1000 manat, hüquqi şəxslər isə 4000 manat məbləğində inzibati qaydada cərimə olunurlar”.

Hüquqşünas vurğulayıb ki, ümumilikdə, normalar yalnız qadağalardan ibarət olmamalıdır:

“Əgər vətəndaşların siqaret çəkməsinə məhdudiyyət qoyulursa, siqaret çəkən şəxslər üçün də xüsusi yerlər ayrılmalıdır. Belə ərazilər müəyyən edilib və onların sanitar vəziyyətinə nəzarət olunursa, vətəndaşın vəzifəsi siqaretdən yalnız həmin yerlərdə istifadə etməkdir. Hesab edirəm ki, vətəndaşlar dövlət tərəfindən müəyyən edilmiş qaydalara əməl etməlidirlər. Bununla yanaşı, sahibkarların və aidiyyəti dövlət qurumlarının da üzərinə müəyyən məsuliyyət düşür. Təcrübədə bəzən siqaret çəkməyin qadağan olunduğunu göstərən məlumatlandırıcı lövhələrə rast gəlinmir. Belə hallarda vətəndaşa sonradan burada siqaret çəkməyin qadağan olduğu bildirilir. Şəxsin isə haqlı olaraq “Bu qadağa harada göstərilib?” sualını vermək hüququ var. Buna görə də qadağaların effektiv tətbiqi üçün məlumatlandırıcı nişanların və lövhələrin quraşdırılması vacibdir”.

Həkim-pulmonoloq Ləman Qlimova isə bildirib ki, siqaret və digər tütün məmulatlarından istifadə insan orqanizminə, xüsusilə ağciyərlərə və bronxlara ciddi zərər vurur:

“Siqaret çəkmək həm istifadəçinin öz sağlamlığına, həm də açıq havada belə ətrafdakı insanlara mənfi təsir göstərir. Bu vərdiş xroniki bronxitin və müxtəlif ağciyər xəstəliklərinin yaranmasına səbəb ola bilər. Buna görə də siqaretin xüsusi ayrılmış ərazilərdə çəkilməsi daha məqsədəuyğundur.

Çimərliklər açıq məkan olsa da, həmin ərazilərdə çoxlu insan, o cümlədən uşaqlar olur. Bu baxımdan orada siqaret çəkilməsi sağlamlıq üçün arzuolunan hal deyil. Ona görə də çimərliklərdə siqaret çəkilməsinə məhdudiyyətlərin tətbiq olunması müsbət və düzgün qərar hesab edilə bilər”.