DÇ-2026-nı hansı yerli televiziya kanallarında izləyə biləcəyik?
Futbol üzrə dünya çempionatının (DÇ-2026) ABŞ, Kanada və Meksikanın ev sahibliyi edəcəyi turnirin 104 oyunundan 92-si İctimai Televiziyanın (İTV) efirində canlı yayımlanacaq.
Ölkə.az xəbər verir ki, bu barədə İTV məlumat yayıb.
Bildirilib ki, Azərbaycan tamaşaçılarının turnirin bütün oyunlarını canlı izləməsini təmin etmək üçün qrup mərhələsinin 3-cü turunda eyni vaxtda keçiriləcək 12 oyunun CBC Sport-da yayımlanmasına İctimai Televiziya tərəfindən imkan yaradılıb.
Bununla da bütün qarşılaşmalar tamaşaçılara canlı şəkildə təqdim olunacaq. Lisenziya qaydalarına əsasən, turnir ərzində yalnız 15 oyun İctimai TV-nin YouTube kanalı üzərindən canlı yayımlanacaq.
Bu çərçivədə ən çox maraq doğuran qarşılaşmalar - Türkiyə millisinin 3 qrup oyunu və 1/8 final mərhələsindən etibarən 12 oyun İctimai TV-nin rəsmi YouTube kanalında canlı təqdim olunacaq.
