Tanınmış vəkilin qızına lazımı tibbi yardım göstərilməyib?

“Abşeron Rayon Mərkəzi Xəstəxanası haqqında da bəzi qeydlərim olacaq. Yazıram ki, bu detallara diqqət yetirilsin, düzəldilsin. Onu da qeyd edim ki, hadisə 16:43-16:44-də baş vermişdi və Zəhranın ürəyi 20:20-yə kimi döyünmüşdü, lakin hadisədən sonra 3 saat 40 dəqiqə ürəyi döyünən Zəhranı xilas etmək mümkün olmadı, ya da ciddi cəhd göstərilmədi”.

Ölkə.az xəbər verir ki, bu fikirləri tanınmış vəkil Fərhad Mehdiyev mərhum qızı Zəhra Mehdizadənin ölümü ilə bağlı yazıb.

O iddia edir ki, Abşeron Rayon Mərkəzi Xəstəxanasında övladına lazımı tibbi yardım göstərilməyib.

F.Mehdiyev söyləyib ki, qızının qəzaya düşdüyü yer Abşeron RMX-dən 300-400 metr aralı olduğu halda, hadisə yerinə təcili tibbi yardım maşını göndərilməyib:

“Camaat uşağa boyun korseti taxmadan hansısa taksiyə qoyub özləri gətirdilər (xəstəni bu şəkildə daşımaq olmaz). Səbəb kimi göstərilir ki, hadisə yerinə çatmaq üçün təcili tibbi yardım maşını uzun yol qət etməli idi. Lakin buna ehtiyac da yox idi, təcili tibbi yardım maşını sürət yolunun sağında olan əlavə yola siqnallarını yandıraraq tərs istiqamətdə gedə bilərdi, hadisə yerinə parallel saxlayıb, uşağa boyun korseti taxılmaqla xərəyə köçürülüb sonra da dəmir jaluzilər üzərindən keçirilməklə xəstəxnaya çatdırıla bilərdi. Həmin o yardımcı yolda Sumqayıt istiqamətində də hərəkət dayandırıla bilərdi. Təcili tibbi yardım işini belə qurmamalıdır. Xəstə xəstəxanaya çatdırılana qədər əlavə travmatik şok yaşamamalıdır. Təcili tibbi yardım maşınları yerində xəstənin vəziyyətini qiymətləndirməli, şinlər və boyun fiksatorlarını taxmalı, lazımdırsa, intubasiya və infuziya tədbirlərini artıq ilkin dəqiqələrdən həyata keçirməlidir”.

Vəkil onu da qeyd edib ki, qızı külli miqdarda qan itirib:

“Onun paltarlarına baxdıqda nə qədər qan itirdiyini anlamaq mümkündür. Sol bud sümüyündə açıq qırıq vardı, ordan nə qədər qan itirdiyini təsəvvür etmək olur. Lakin ona hərhansı qan köçürülmədi.

Mən anlayıram ki, Zəhranın aldığı zədələr çoxlu və ağır idi, amma belə anlayıram ki, xəstəxana heyəti bu uşağın başdan yaşamayacağına qərar verib, ciddi müdaxilə etmək də istəmədilər, məsələn sol budundakı açıq yaraya xəstəxanada tikişin atılmaması, həkim heyətinin xəstənin yaşamayacağını düşündüyünü göstərir.

Əgər Abşeron RMX-də ağır xəstələrə müdaxilə etmə və ciddi reanimasyon tədbir göstərmə imkanları yoxdursa, bunu bəyan eləsinlər insanlar da ora deyil, digər xəstəxanalara yönəlsinlər, çünki ağır vəziyyətdə olan xəstələr üçün hər dəqiqə dəyərlidir. Daha əvvəl də həmin xəstəxanada KT aparatının işləmədiyini də qeyd etmişdim.

TƏBİB-də öz növbəsində Abşeron RMX-nin TTY şöbəsinin maddi-texniki dəstəyini, habelə personal üçün təlim dəstəyini artırmalıdır.

Bədbəxt hadisələrdə xəstəyə ilkin müdaxilənin düzgün aparılması onun həyatını xilas etmək baxımından olduqca vacibdir. Nəzərə alınmalıdır ki həmin xəstəxana geniş əraziyə xidmət göstərir və oradaki xidmətlərin düzgün qurulması ciddi əhəmmiyyət daşıyır”.

Ölkə.az F.Mehdiyevin iddiaları ilə bağlı TƏBİB-ə sorğu ünvanlayıb.

Qurumdan saytımıza bildirilib ki, xəstə tibb müəssisəsinə son dərəcə ağır vəziyyətdə çatdırılıb:

“Daxil olduqdan dərhal sonra reanimasiya və intensiv terapiya tədbirlərinə başlanılıb, hava yolunun keçiriciliyinin təmin edilməsi məqsədilə intubasiya icra olunub, mərkəzi venoz kateter yerləşdirilib, hemodinamik göstəricilərin stabilləşdirilməsi üçün infuzion terapiya və vazopressor dəstəyi göstərilib.

Eyni zamanda açıq sınıq sahəsinə ilkin tibbi yardım göstərilib, yara işlənilib və ətrafın immobilizasiyası məqsədilə gips qoyulub.

İlkin qiymətləndirmə zamanı baş-beyinin alın payının əzilməsi, döş qəfəsinin əzilməsi, bud-çanaq oynağı nahiyəsinin sınığı və massiv qanaxma ilə müşayiət olunan çoxsaylı ağır travmalar müəyyən edilib. Həkimlər tərəfindən xəstənin həyatının xilas olunması, həyati vacib funksiyalarının qorunması və vəziyyətinin stabilləşdirilməsi istiqamətində bütün zəruri tibbi tədbirlər həyata keçirilib.

Bununla belə, alınmış çoxsaylı ağır travmalar və onların yaratdığı ağır fəsadlar fonunda ürək fəaliyyəti dayanıb və bioloji ölüm baş verib.

Baş vermiş hadisə ilə əlaqədar vəfat edən şəxsin yaxınlarına dərin hüznlə başsağlığı verir və yaşanan hadisədən kədərləndiyimizi bildiririk”.