Azərbaycanda Milli Məlumat Hövzəsi yaradılıb
"Rəqəmsal inkişafın sürətləndirilməsinə dair 2026−2028-ci illər üçün Fəaliyyət Planı rəqəmsallaşma, süni intellekt, innovasiya ekosistemi və kibertəhlükəsizlik istiqamətləri üzrə 58 təşəbbüsü əhatə edir".
Ölkə.az xəbər verir ki, bunu rəqəmsal inkişaf və nəqliyyat naziri Rəşad Nəbiyev Rəqəmsal İnkişaf Şurasının ilk iclasında deyib.
Nazir bildirib ki, fəaliyyət planının icrası ilə bağlı görülən işlər çərçivəsində 40 dövlət qurumu ilə yol xəritələri hazırlanıb, onlardan 13-ü artıq təsdiqlənib və ya təsdiq mərhələsindədir.
Rəşad Nəbiyev Milli Məlumat Hövzəsinin yaradılması, dövlət informasiya sistemlərinin hökumət buluduna miqrasiyası və yeni data mərkəzinin tikintisi üzrə işlərin davam etdiyini vurğulayıb. Nazir "MyGov" platformasının xidmət dairəsinin genişləndirildiyini qeyd edərək, son üç ayda istifadəçilərin sayının 2.7 milyondan 3.5 milyona çatdığını bildirib: "Artıq bir neçə tətbiq platformaya inteqrasiya olunub, daha yeddi dövlət tətbiqinin xidmətləri isə ilin sonunadək vətəndaşların istifadəsinə veriləcək".
Nazir fəaliyyət planının əsas prioritetlərindən birinin süni intellekt olduğunu vurğulayaraq, "MyGov" və digər dövlət qurumlarında süni intellekt həllərinin tətbiqinin genişləndirildiyini və virtual vətəndaş köməkçisinin istifadəyə verildiyini deyib. O, innovasiya ekosisteminin inkişafı çərçivəsində texnoloji suverenliyi gücləndirən şirkətləri bir araya gətirmək məqsədilə "Azərbaycan Dayanıqlılıq Klasteri"nin yaradılmasına başlanıldığını diqqətə çatdırıb.
Kibertəhlükəsizlik sahəsində görülən işlərə toxunan nazir Milli Təhlükəsizlik Əməliyyatları Mərkəzi, Milli Kiber İnsidentlərə Qarşı Mübarizə Mərkəzi və Rəqəmsal Təhqiqat Mərkəzinin yaradılması, həmçinin dövlət və özəl sektor arasında operativ məlumat mübadiləsini təmin edəcək vahid milli kibertəhlükəsizlik platformasının qurulması istiqamətində işlərin davam etdiyini bildirib.
