Hansı banklar səyahət krediti verir?

Azərbaycanda banklar müştərilərin şəxsi ehtiyaclarının qarşılanması üçün istehlak və ya nağd pul kreditləri təklif edir. Bu kreditlər təhsil, təmir, məişət xərcləri və digər məqsədlərlə yanaşı, səyahət xərclərinin maliyyələşdirilməsi üçün də istifadə oluna bilər.

Ölkə.az Valyuta.az-a istinadən xəbər verir ki, yay mövsümü və məzuniyyət dövründə səyahətə maraq artdığından, bəzi vətəndaşlar planlaşdırdıqları səfərin xərclərini qarşılamaq və ya ayırdıqları büdcəni artırmaq məqsədilə istehlak kreditlərinə müraciət edirlər.

Bununla yanaşı, bəzi banklar səyahət məqsədi üçün ayrıca kredit məhsulu da təqdim edir. Bu kateqoriyada "Premium Bank" müştərilərinə "Səyahət krediti" təklif edir.

Bankın təqdim etdiyi kreditin maksimal məbləği 20 min manatdır. Kredit 12 ay müddətinə, illik 9,5% dərəcəsi ilə verilir. Kredit üzrə komissiya tutulmur, faktiki illik faiz dərəcəsi (FİFD) isə minimum 9,5 faiz təşkil edir.

Məhsul əməkhaqqı və ya təqaüd alan şəxslər üçün nəzərdə tutulub. Kredit üçün müraciət zamanı şəxsiyyət vəsiqəsi, həmçinin rəsmi gəliri təsdiq edən sənədlər təqdim edilməlidir. Bankın tələblərinə əsasən, müraciət edən şəxsin cari iş yerində minimum 6 aylıq iş stajı olmalı və yaşı ən azı 20 olmalıdır.

Bank bildirir ki, digər banklarda aktiv krediti olan şəxslərin müraciətlərinə də baxıla bilər. Xüsusi hallarda zamin tələb oluna, həmçinin kredit üzrə sığorta təklif edilə bilər.

Qeyd edək ki, kreditin verilməsi ilə bağlı yekun qərar bankın daxili kredit siyasəti çərçivəsində qəbul edilir.