Dövlətə borclu şirkət Təbriz küçəsini 23 milyona abadlaşdıracaq
Bakının Nərimanov rayonunda yerləşən Təbriz küçəsinin Ağa Nemətulla küçəsi ilə kəsişməsindən Əhməd bəy Ağaoğlu küçəsi ilə kəsişməsinədək olan hissəsində abadlıq-yenidənqurma işləri həyata keçiriləcək.
Ölkə.az Plat.az-a istinadən xəbər verir ki, işlərin həyata keçirilməsi üçün elan olunan satınalma müsabiqəsinin qalibi "Qrand Dizayn Konstrakşn" MMC-dir.
Bunun üçün Bakı Şəhər İcra Hakimiyyəti başçısının tabeliyində "Bakı Şəhər Əsaslı Tikinti və Təmir" MMC şirkətə 22 milyon 966 min 964 manat ödəyəcək.
Qeyd edək ki, "Qrand Dizayn Konstrakşn" şirkətinin nizamnamə kapitalı 100 manat, qanuni təmsilçisi isə Səbuhi Nurullayevdir. Dövlət Vergi Xidmətinin kommersiya qurumlarının dövlət reyestri məlumatlarına əsasən, şirkətin hazırda dövlətə 55 min 775 manat vergi borcu var.
Məlumat üçün deyək ki, qanunvericiliyə görə, vergi borcu olan şirkətin dövlət satınalmalarında iştirak hüququ yoxdur.
