Deputat həmkarları Siyavuş Novruzovu belə təbrik etdilər
Millət vəkili Siyavuş Novruzovun doğum günüdür
Siyavuş Novruzov Azərbaycan siyasətində qalmaqallı açıqlamaları və atmacaları ilə gündəmdə olan siyasətçilərdəndir.
Deputat həmkarları Siyavuş Novruzov barədə fikirlərini Ölkə.Az vasitəsi ilə bölüşüblər:
Fəzail Ağamalı: "Deməzdim ki, Siyavuş Novruzov qalmaqallı deputatdır. Siyavuş Novruzov kifayət qədər təmkinli, proseslərə özünəməxsus, obyektiv, Azərbaycan dövlətinin və xalqının maraqları prizmasından yanaşan və hər zaman özünün prinsipiallığını ortalığa qoyan bir siyasətçidir. Siyavuş Novruzov saçını, saqqalını siyasətdə ağardıb. Onun bir millət vəkili kimi müasir Azərbaycanın inkişafında özünəməxsus yeri var. Siyavuş Novruzov həm də vətənpərvər, millətinin qədrini bilən, milli dəyərlərə hər zaman hörmət edən bir Azərbaycan oğludur. Tam səmimiyyətlə deyirəm ki, Siyavuş Novruzov Azərbaycan xalqının sayılıb-seçilən oğullarından biridir.
Siyavuş Novruzovla biz partiya qonşusuyuq. Onun və hər birimizin mikrafondan kənar hər zaman sözlərimiz, atmacalarımız olur. Siyavuş Novruzov bu baxımdan xüsusilə fərqlənir. Onun hər bir atmacası hər birimizdə təbəssüm və gülüş doğurur. Çünki Siyavuş Novruzovun atmacaları yerində və tam hədəfə dəyir. Bəzi deputatlar ona salam verəndə həmişə deyir, mən bilmirəm bu salamın arxasında nə dayanıb, bu salamı alım, yoxsa yox. Siyavuş Novruzovda çox güclü yumor hissi var. Sizin sayt vasitəsi ilə Siyavuş Novruzovun doğum gününü təbrik edirəm, ona möhkəm can sağlığı, ailə səadəti arzu edirəm, balalarının toyunu görsün".
Araz Əlizadə: "Elə mənə də qalmaqallı deputat deyirlər. Siyavuş Novruzovla bağlı yadımda qalan ən maraqlı xatirə odur ki, ANS-də "Nəzər Nöqtəsi" adlı veriliş var idi, Qənirə Paşayeva o zaman jurnalist idi, verilişi o aparırdı. Siyavuş Novruzovla debatda olduğumuz gün Bakıda güclü zəlzələ baş vermişdi. Həmin gün çox səs-küylü veriliş oldu. Zəlzələdən heç xəbərimiz olmayıb. Verilişdən çıxdıq, gördük ki, camaat küçədədir. Dedim, xeyir ola, nə məsələdir? Dedilər, zəlzələ oldu. Dedim, neyləyim, təqsir məndə deyildi, Siyavuş Novruzovda idi. Dedilər, verilişi demirik, həqiqətən zəlzələ oldu. Siyavuş Novruzovu doğum günü münasibəti ilə təbrik edirəm".
Aqil Abbas: "Siyavuş Novruzov öz əqidəsinə sadiq bir deputatdır. O, qalmaqal yaratmayıb. Nə zaman qalmaqal yaradıb? Sadəcə olaraq onun bəzi sözləri var ki, onu müxalifət qəbul etmir. Siyavuş Novruzovla aramızda gülməli bir hadisə olmayıb. Onu doğum günü münasibəti ilə təbrik edirəm".
Xatırladırıq ki, Siyavuş Novruzov 17 fevral 1969-cu ildə Naxçıvan MSSR–in Cəhri kəndində anadan olub. Orta məktəbi bitirəndən sonra ali məktəbdə hüquq təhsili alıb.
İlk dəfə 2000-ci ildə ikinci çağırış Milli Məclisə proporsional seçki sistemi ilə çoxmandatlı seçki dairələri üzrə deputat seçilib. 2005-ci ildə isə majoritar qaydada 5 saylı Şahbuz-Babək seçki dairəsindən millət vəkili seçilib. 2010-cü il noyabrın 7-də dördüncü çağırış Milli Məclisə keçirilən seçkilərdə 3-cü dəfə mandat qazanıb, 5 saylı Şahbuz-Babək seçki dairəsindən deputat olub. Siyavuş Novruzov 2015-ci il parlament seçkilərində də millət vəkili seçilib. O, hazırda Milli Məclisin Təhlükəsizlik və Müdafiə Komitəsinin üzvü, eyni zamanda parlamentin İntizam komissiyasının sədridir.
