Araz Əlizadə: \"Xocalını qorumalı olan batalyonlar Xalq Cəbhəsinin tabeliyində idi\"

Azərbaycanın hərbi prokuroru Xanlar Vəliyev “Azərbaycan xalqına qarşı 1918-ci il soyqırımları” kitabının təqdimatında Xocalı faciəsi ilə bağlı çıxış edib.

Hərbi prokuror çıxış edərkən deyib ki, o dövrkü prezident Ayaz Mütəllibov Xocalı faciəsinin baş verəcəyini əvvəlcədən bilirdi.

Xanlar Vəliyevə cavab olaraq Azərbaycanın eks-prezidenti Ayaz Mütəllibov bildirib ki, “1992-ci il fevralın 25-i axşam saat 11-ə işləmiş milli təhlükəsizlik naziri İlhüseyn Hüseynov və daxili işlər naziri Tofiq Kərimov çox həyəcanlı vəziyyətdə yanıma gəldilər və “Xocalıda nə isə olub” dedilər. Bundan sonra baş verən hadisə barədə mənə dəqiq məlumat verdilər.

O zaman baş verən proseslərin iştirakçılarından olan millət vəkili Araz Əlizadə bu məsələ ilə bağlı Ölkə.Az-a danışıb:

"Rusiya prezidenti Yeltsinin ətrafında satqınlar olmasaydı və ermənilərə xəbər verməsəydilər ki, növbəti gün səhər tezdən 366-cı alay Dağlıq Qarabağı tərk edəcək, bəlkə də bu faciə baş verməzdi.

Əlbəttə ki, Xocalıda belə bir hadisənin ola biləcəyi ilə bağlı informasiya var idi. 1992-ci il fevralın 12-də Ayaz Mütəllibov Ağdama Tamerlan Qarayevi göndərdi. O zaman Ağdamın komendantı Tahir Əliyev idi, oraya külli miqdarda pul və silah göndərdi ki, Xocalıya yardım etsinlər. Ondan bir neçə gün sonra məni də Moskvaya göndərdilər ki, Yetsinlə danışıb, 366-cı alayı Dağlıq Qarabağdan çıxardaq. Prezident başqa nə etməli idi? Özünümüdafiə batalyonları Xalq Cəbhəsinin tabeliyində idi və onlara da hər cür silah-sursat, pul göndərilmişdi.

SSRİ, sonradan Rusiyanın müdafiə naziri aviasiya marşalı Yevgeni Şapişnikov, onun birinci müavini, sonradan Rusiyanın müdafiə naziri olmuş Pavel Qraçovla danışıqlar aparmışdım. Yetsinlə səhər görüşmüşdüm. O da bildirdi ki, 366-cı alayın Dağlıq Qarabağdan çıxarılması məsələsini həll etmək lazımdır. Günün ikinci yarısında Yetsinlə yenidən görüşüb, sənədlər imzalayacaqdıq. Bütün sənədləri hazırladıq, əfsuslar olsun ki, günün ikinci yarısında Yetsin iş qabiliyyətində deyildi. Ona görə də həmin sənədlərin imzalanması növbəti günə qaldı. O zaman ermənilərə kimin məlumat verdiyini bilmədim, ancaq həmin gecə saat 3-də Şapoşnikov mənə zəng edib dedi ki, Xocalıda belə bir hadisə baş verib. Ermənilərə məlumat ötürmüşdülər ki, 366-cı alay Dağlıq Qarabağdan çıxarılacaq, ona görə də, onlar həmin gecə işlərini gördülər".

Səxavət Məmməd
Ölkə.Az