Qarabağda döyüşmək istəyən qazax qardaşımızdan prezidentə müraciət
Özəlliklə hörmətli cənab Prezident İlham Əliyev!
Mən, Qazaxıstan Respublikasının vətəndaşı, Qazaxıstan ordusunun ehtiyatda olan sıravisi Kasımov Daniyar Kuandıkulı Sizə Türk dünyasının birliyinin möhkəmləndirilməsində olan rolunuza görə öz dərin təşəkkürümü bildirmək istəyirəm.
2015-ci ildə Siz şəxsən Qazaxıstana səfər edib bizim xalqımızı Qazax xanlığının 550-illiyi ilə təbrik etdiniz, beləliklə Qazax dövlətçiliyinin möhkəmlənməsinə əhəmiyyətli töhfə verdiniz. 2009 və 2014-cü illərdə mən Qardaş Azərbaycana səfər etmişəm. Jurnalist qismində mən türkdilli dövlətlərin rəhbərlərinin İX-cu Sammitinin işıqlandırılmasında iştirak etmişəm. Naxçıvan şəhərində dinlədiyim “Qarabağ” mahnısı mənə çox dərin təəssürat bağışladı. Sizin gözəl ölkənizdə separatizmlə mübarizənin nə dərəcədə vacib olmasını mən çox gözəl dərk edirəm.
Dağlıq Qarabağ və ona bitişik 7 rayon təkcə Azərbaycanın deyil, həm də bütün Türk dünyasının tərkib hissəsidir. Azərbaycan Respublikasının şanlı ordusu sizin müdrik komandanlığınız ilə öz Vətəninin ərazi bütövlüyünü bərpa etmək uğrunda ağır mübarizə apardığı bu çətin məqamda mən də kənarda qala bilmirəm. Öz məsuliyyətimi tam şəkildə dərk edərək sizi məlumatlandırmaq istəyirəm ki, mən cəbhədəki vəziyyətin tələb etdiyindən asılı olaraq istənilən qismdə, istənilən ərazidə, istənilən müddətə qardaş Azərbaycan xalqının ilk çağırışına cavab olaraq Azərbaycan Respublikasının Hərbi Qüvvələrində xidmət etməyə hazıram. Mən öz üzərimə düşən öhdəlikləri geriyə çəkilmədən yerinə yetirməyimə, döyüş vəziyyətində hərbi xidmətin bütün çətinliklər və məhrumiyyətlərinə dözməyimə və əgər tələb olunarsa, qardaş Azərbaycanın ərazi bütövlüyünün bərpa olunması üçün öz həyatımı belə qurban verməkdən çəkinməyəcəyimə and içirəm!
Xüsusi hörmətlə, Daniyar Kasımov, Qazaxıstan Hərbi Qüvvələrinin ehtiyatda olan sıravisi.
