Astarada Milli Orduya dəstək mitinqi
Astara rayonunun Təngərüd kənd orta məktəbinin həyətində Milli Orduya həmrəylik nümayiş etdirmək məqsədilə rayon ictimaiyyətinin, ağsaqqalların və gənclərin nümayəndələrinin, müharibə veteranlarının, valideynlərin, kənd sakinlərinin iştirakı ilə izdihamlı mitinq keçirilib.
Ölkə.Az APA-ya istinadən xəbər verir ki, əllərində Azərbaycan Respublikasının üçrəngli bayrağını, “Qarabağ bizimdir, bizim olacaq!”, “Şəhidlər ölməz, Vətən bölünməz!”, “Rəşadətli Milli Ordumuza eşq olsun!”, “Qələbə bizimlədir” şüarlarını tutan gənclər meydana toplaşıblar.
Əvvəlcə cəbhədə döyüşlər zamanı şəhid olmuş hərbi qulluqçuların xatirəsi bir dəqiqəlik sükutla edilib. Daha sonra mitinq iştirakçılarına son günlər erməni silahlı qüvvələrinin cəbhənin təmas xəttində törətdiyi təxribatlar barədə məlumat verilib.
Diqqətə çatdırılıb ki, düşmənlə döyüşlərdə astaralı gənclər də böyük igidlik və fədakarlıq nümunəsi göstəriblər. Onlardan dörd nəfəri-Astara şəhər 1 nömrəli tam orta məktəbin məzunu, Milli Ordunun giziri Orxan Məhərrəm oğlu Əliyev, Təngərüd kənd tam orta məktəblərinin məzunları, Milli Ordunun əsgərləri Kamus Ramiz oğlu Məmmədov və Zəka Əbülfət oğlu Fərəməzov, Maşxan kənd tam orta məktəbinin məzunu, Milli Ordunun giziri Elvin Natiq oğlu Qasımov mənfur düşmənlə döyüşlərdə mərdliklə döyüşərək yaralanıblar. Astaralıların cəsur el oğulları ilə fəxr etdikləri dilə gətirilib.
Həmrəylik mitinqində çıxış edənlər Milli Ordumuzun döyüşlərdə qazandığı uğurlardan böyük sevinc və qürur hissi keçirdikləri qeyd edərək hər an düşmən tapdağı altında olan torpaqlarımızın azad edilməsi üçün döyüşlərə hazır olduqlarını bildiriblər. Tədbirin hərbi-vətənpərvərlik mövzusunda səslənən mahnılarla başa çatıb.
