Təmas xəttində 3 aviabomba aşkarlanıb
Azərbaycan Respublikası Ərazilərinin Minalardan Təmizlənməsi üzrə Milli Agentlik (ANAMA) tərəfindən aprelin 7-dən 24-dək Zərdab, Tərtər, Ağcabədi,Ağdam, Füzuli, Goranboy və Tovuz rayonlarında 334 ev və həyətyanı sahəyə, 2 hərbi hissə, 1 kənd qəbiristanlığı, 1 kənd orta məktəbi, 5 ferma, 4 əkin sahəsi və bir çaxır zavodu ərazisinə baxış keçirilib. Baxış zamanı 941 ədəd partlamamış hərbi sursat (PHS) və 8 ədəd piyada əleyhinə mina (PMN) aşkar olunaraq zərərsizləşdirilib.
Ölkə.Az ANAMA mətbuat mərkəzindən anspress-ə daxil olan məlumata görə, aprelin 24-də Tərtər rayonunun Qapanlı kəndində 2 ev və həyətyanı sahədə 5 partlayış yerinə baxış keçirilib, 1 ədəd 122 millimetrlik top mərmisi və 2 ədəd 122 millimetrlik partlamamış top mərmisinin partladıcısı aşkar edilərək götürülüb. Ümumilikdə 6 min kvadratmetr ərazi yoxlanılıb.
Qaradağlı kəndində 2 ev və həyətyanı sahədə 3 partlayış yerinə baxış keçirilib, 14 min kvadratmetr ərazi yoxlanılıb və partlamamış hərbi sursat aşkar edilməyib.
Əskipara kəndində 1 ev və həyətyanı sahədə 3 partlayış yerinə baxış keçirilib, 5 min kvadratmetr ərazi yoxlanılıb və PHS aşkarlanmayıb.
Goranboy rayonunun Tap Qaraqoyunlu kəndində iki ev və həyətyanı sahələrdə 7 partlayış yerinə baxış keçirilib, partlamamış hərbi sursat aşkar edilməyib, 920 kvadratmetr ərazi yoxlanılıb.
Füzuli rayonunun Alıxanlı kəndində 2 ev və həyətyanı sahəyə, Çaxır zavodu ərazisində 2 partlayış məntəqəsinə və 4 bələdiyyə torpağı ərazisinə baxış keçirilib, 8 partlamış top mərmisinin qəlpələri aşkar edilib, 2 min 200 kvadratmetr ərazi yoxlanılıb.
Ağdam rayonunun Əfətli kəndi ərazisindən keçən Qarqar çayı ilə axıb gələn 2 ədəd PMN minası partlayış yolu ilə məhv edilib.
Samux rayonunun Kolayır kəndində 160 ədəd 12.7 millimetrlik və 15 ədəd 7.62 millimetrlik patron aşkar edilib. Ümumilikdə bu rayonda 3 ədəd OFAB-50 aviabomba, 778 ədəd 12.7 millimetrlik və 15 ədəd 7.62 millimetrlik kiçik çaplı mərmi tapılıb. Ümumiyyətlə, 790-dan çox partlamamış hərbi sursat aşkarlanıb.
Aprelin 24-də Agentlik tərəfindən 7 ev, 26 partlayış yeri yoxlanılıb, 178 ədəd partlamamış hərbi sursat və 2 ədəd mina aşkar edilib və 28 min 120 kvadratmetr ərazi yoxlanılıb.
Hazırda Agentlik tərəfindən yaradılmış xüsusi təyinatlı mobil çevik qrupları minaaxtaran itlərin dəstəyi ilə təmas xəttinə yaxın kəndlərdəki evlərlə yanaşı, məktəblər və digər obyektlərin yerləşdiyi ərazilərdə əməliyyatları davam etdirir.
