Ümid Partiyası: "Təəssüflər olsun ki, MSK öz vəzifəsini icra etmir"
Mayın 10-dan etibarən 90 saylı Ağdaş seçki dairəsindən namizədliyi irəli sürülmüş Ümid Partiyasının sədri İqbal Ağazadəyə imza vermiş şəxslərə qarşı təzyiq, təqiblər başlayıb və davam etməkdədir.
Partiyadan bildirilir ki, məsələnin dəfələrlə mətbuatda işıqlandırılmasına, bəyanatların verilməsinə, MSK-ya, Baş prokurorluğa və DİN-ə müraciət olunmasına baxmayaraq həmin dairədən namizədliyi qeydə alınmış, Ağdaş Rayon İcra Hakimiyyətinin birinci müavini, Ağdaş YAP-ın sədri Cavid Osmanovun təşkil etdiyi bu qeyri-qanuni hərəkətlər səngimək bilmir.
"İmza verənlərdən təzyiq yolu ilə İqbal Ağazadənin əleyhinə ərizə alınması ilə bağlı məlumat vermişdik. Bu gün bizə imza verən bəzi vətəndaşlar adından teleqramlar daxil olmaqdadır. Teleqramlarda guya ki, İqbal Ağazadənin imza toplayanlarının onları aldadaraq imza topladıqları göstərilir. Bu teleqramlar bir daha bizə bu günə qədər imza verənlərə olan təzyiqlərlə bağlı məlumatları təsdiqləyir. Teleqramların mətnində o qədər səhvə yol verilib ki, hətta bu səhvlər əsasında onu təşkil edənlərin özünü ittiham və məsuliyyətə cəlb etmək mümkündür. Xəbər verdiyimiz kimi, bu teleqramları təşkil edən də 90 saylı Ağdaş DSK sədri və Ağdaş rayon İcra hakimiyyətinin I müavinidir.
Bir daha bildiririk ki, imza yoxlama mexanizmində imza verən vətəndaşa müraciət olunma məsələsi yoxdur. İmzaların bu şəkildə yoxlanması Seçki Məcəlləsinin tələblərinə, seçicilərin iradəsini azad şəkildə ifadə etməsinə ziddir.
Ümid sədrinin namizədliyinin qeydə alınması üçün tələb olunan imza vərəqələri artıq beş gündür ki, 90 saylı Ağdaş DSK-na təqdim olunub. Namizədin hələ də qeydə alınmamasına baxmayaraq imza verənlərə qarşı təzyiqlər, habelə təşkil olunmuş "vətəndaş məktubları" bunu göstərir ki, Dairə Seçki Komissiyası imza vərəqələrini yoxlayarkən vətəndaşların kimliyi haqda məlumatları YAP namizədinə ötürməklə DSK-nın tərəfsizliyi prinsipini və Seçki Məcəlləsini aşkar şəkildə pozaraq imza verənlərə qarşı təzyiqlərdə birbaşa iştirak etmişdir.
Bir daha qeyd edirik ki, bununla bağlı MSK-ya bir neçə dəfə teleqram göndərilsə də, təəssüflər olsun ki, MSK öz vəzifəsini icra etmir."
