Dövlət sənədsiz “Sovetski” sakinlərinə də pul ödədi

“Heç kim evindən zorla çıxarılmır”

“Sovetski”də heç kimin evi zorla sökülmür, bu barədə söhbət ola bilməz.

Bunu jurnalistlərə açıqlamasında baş nazirin müavini Abid Şərifov deyib. Onun sözlərinə görə, “Sovetski” sakinlərindən kim istəyirsə, qalıb orada yaşaya bilər.

Baş nazirin müavini vurğulayıb ki, sakinlərə verilən 1500 manat kompensasiya az pul deyil:

“Bakıda evlərin qiymətləri ilə maraqlana bilərsiniz. “Mən 15 kvadrat metr ərazidə yaşayıram, onu satsam gedib özümə başqa yerdən ev ala bilməyəcəm” məsələsi başqa sualdır. Bu barədə düşünürük. Yəqin ki, bu məsələ həll olunacaq, amma buna vaxt lazımdır. Hazırda “Sovetski”dən kim istəyir gedir, kim istəyir qalır. Onlar bütün kommunikasiya xətləri ilə təmin olunur. Heç kim evindən zorla çıxarılmır”.

Bakıda olan sənədsiz evlərlə bağlı məsələyə gəlincə isə A. Şərifov qeyd edib ki, sənədsiz evlər sökülmür. İstər şəhərdən kənarda, istər şəhərin mərkəzində yollar çəkilir. Kim deyə bilər ki, bir nəfər Azərbaycan vətəndaşının sənədsiz evi sökülüb vəsait ödənilməyib. Bu, ola bilməz. 3-cü mikrorayonda evlərin 90 faizinin sənədi yoxdur, orada tunellərin, körpülərin tikintisi ilə bağlı 100-dən çox ev söküldü. Heç birinin sənədi yox idi, amma sakinlərin hamısına kompensasiya ödənilib”./Modern.az/

Ölkə.Az