Məşhur opera müğənnisindən növbəti hörmətsizlik

Monserrat Kabalye Dağlıq Qarabağa qanunsuz səfər edib.

Ölkə.Az Ermənistan mətbuatına istinadən xəbər verir ki, dünya şöhrətli ispan opera müğənnisi Monserrat Kabalye oktyabrın 12-də növbəti dəfə Dağlıq Qarabağa qanunsuz səfər edib. 

Opera ifaçısı oktyabrın 14-də işğal altındakı Xankəndi şəhərində konsert proqramı ilə çıxış edəcək. Müğənninin Dağliq Qarabağ qondarma respublikasının lideri Bako Saakyanla görüşəcəyi gözlənilir. Monserrat Kabalyenin konserti Dağlıq Qarabağ müharibəsində atəşkəsin elan olunmasının 20 illiyinə həsr olunacaq.

Xatırladaq ki, bu Monserrat Kabalyenin Azərbaycana qarşı hörmətsizlik etdiyi ilk hal deyil. Belə ki, o, ilk dəfə 2013-cü ilin iyununda Azərbaycanın işğal altındakı Dağlıq Qarabağ bölgəsini qanunsuz ziyarət edərək "Ermənistan, Artsax: xristianlıq adası" adlı albomunu təqdim edib. Məhz bu səfərdə sonra ispan opera müğənnisi Azərbaycan Xarici İşlər Nazilriyinin "arzuolunmaz şəxslər" siyahısına da daxil edilib.

Qeyd edək ki, Monserrat Kabalye 2004-cü il noyabrın 4-də Bakıya da gələrək Opera və Balet Teatrında konsert verib.

Rəşid Mustafazadə

Ölkə.Az