QMİ rəsmisi jurnalistləri ehtiyatlı olmağa çağırdı
Qafqaz Müsəlmanları İdarəsinin (QMİ) Aparat rəhbəri Simran Həsənov dini mövzuda, xüsusilə də sünni-şiə məsələlərindən yazan jurnalistləri ehtiyatlı olmağa çağırıb.
Ölkə.Az-ın məlumatına görə, QMİ rəsmisi S.Həsənov Bakıda keçirilən “Dini radikalizm və xurafat: bir medalın iki üzü” mövzusunda keçirilən konfransda çıxışı zamanı deyib ki, din kimi həssas mövzudan yazmaq üçün jurnalistlərin müəyyən hazırlığı olmalıdır:
“Çox təəssüf ki, xurafat, dini radikalzmlə mübarizə adı altında bəzi media orqanlarında işıq üzü görən yazılar əslində əks məqsədə xidmət edir. Sünni-şiə məsələsi barədə yazılar yazanda xüsusən ehtiyatlı olmaq lazımdır. Bəzi jurnalistlər ehtiyatlı olmurlar və bu da sonra müəyyən problemlərə gətirib çıxarır. Digər tərəfdən, bəzən jurnalistlərin Qafqaz Müsəlmanları İdarəsinin hüquq və vəzifələri barədə bəzən məlumatlı olmadığını müşahidə edirik. Hər hansı qəbiristanlığın qarşısında duran mollanın, hansısa ucqar kənddə keçirilən hansısa kiçik mərasimin Qafqaz Müsəlmanları İdarəsinə hər hansı aidiyyatı yoxdur. Qafqaz Müsəlmanları İdarəsinin təyin etdiyi din xadimlərinin adları İldarənin saytında da yerləşdirilir. Ümumiyyətlə, Qafqaz Müsəlmanları İdarəsi tərəfindən jurnalistlər üçün 2-3 günlük seminar keçirilməsinə də ehtiyac görürük və bu istiqamətdə addım atılacaq”.
Zaur Əziz
