"Bələdiyyə seçiklərinə marağı artırmaq üçün onların statusu dəyişməlidir"

Azərbaycan Respublikasında yerli özünüidarə vətəndaşların fəaliyyətinin təşkilinin elə bir qeyri-dövlət sistemidir ki, bu sistem qanun çərçivəsində onlara yerli əhəmiyyətli məsələləri müstəqil və sərbəst şəkildə həll etmək hüququnu həyata keçirmək imkanı verir. Bu hüququ qanunla müəyyən edilmiş qaydada ümumi, bərabər, birbaşa seçki hüququ əsasında sərbəst, şəxsi və gizli səsvermə yolu ilə seçilmiş bələdiyyə üzvlərindən ibarət nümayəndəli kollegial orqanlar (bələdiyyələr) və ya vətəndaşların yığıncaqları həyata keçirirlər. Bələdiyyələr öz vəzifələrini yerinə yetirmək məqsədi ilə onların qarşısında məsuliyyət daşıyan, daimi fəaliyyət göstərən icra strukturları yarada bilərlər.

Qarşıdan gələn Bələdiyyə seçkiləri ilə bağlı Ölkə.az Azərbaycanın tanınmış siyasətçilərinin rəyini öyrənib:

Pənah Hüseyn: "Çox təəssüflə deyirəm ki, yerli özünüidarə sistemi bizdə formal olaraq mövcud oldu və özünün sosial funksiyasını hələ ki, yerinə yetirmək dərəcəsində formalaşmayıb. Dekabrda keçiriləcək bələdiyyə seçkilərinə gəlincə, bunun ciddi hadisə olmadığının qənaitindəyəm".

Siyavuş Novruzov: "Bələdiyyə seçkiləri ən vacib seçikilərdir, xüsusəndə siyasi partiyalar üçün. Azərbaycanda təxminən 1607 bələdiyyəyə 15035 nəfər üzv seçilməlidir. Siyasi partiyanın iştirakı üçün ən azı bu bələdiyyələrin 30%ində iştirak etməkvacibdir. Təxminən 5000 namizəd irəli sürə biləcək hər hansı bir partiya bu kompaniyada iştirak edir.

Bu gün bələdiyyələri lazımsız orqan hesab edənlərin problemi ondan ibarətdir ki, onlar heç bu bələdiyyələrin 30 %ində də iştirak edə bilmirlər, çünki onların namizədləri, sosial bazaları yoxdur. Buna görə də özlərini biabır etməmək üçün bu cür şüarlar irəli sürürlər. YAP 1607 bələdiyyənin hər birinə 1535 nəfər namizəd irəli sürüb. Artıq namizədlər hazırdır, həftəsonu MSK-nın dairə seçki komissiyalarına təqdim ediləcək".

Sərdar Cəlaloğlu: "Bələdiyyə digər seçkilərdən fərqli olaraq yerli sakinlərin aktiv iştirakını tələb edir. Gərək bələdiyyələr o qədər aktivlik nümayiş etdirsinlər ki, yerli təşkilatlar da bu proseslərdə iştirak etsinlər. Çox təəssüf ki, bələdiyyələrin bu statusunun silinməsi, rolunun azalması üzvlərə bələdiyyə seçkilərində iştirak etməyə az maraq yaradır. Azərbaycanda seçki təcrübəsi qüsurlu olduğuna görə, insanlarda seçkilərə inam yoxdur. Əslində bunlar çox ciddi şəkildə təşkil edilə bilər, ancaq bu zaman ciddi maliyyə resusları lazımlıdır. Bu baxımdan bunları uzlaşdırmaq çox çətin olur. Gərək xərclənən pullara dəyəcək bir iş olsun".

Xatırladaq ki, Bələdiyyə - qanunla müəyyən edilmiş ərazi hüdudları daxilində yerli özünüidarəetmə formasıdır. Bələdiyyənin öz mülkiyyəti, yerli büdcəsi və seçkili bələdiyyə orqanları olur və o, Azərbaycan Respublikasının Konstitusiyası ilə və bu qanunla səlahiyyətlərinə aid edilmiş yerli əhəmiyyətli məsələləri müstəqil surətdə həll edir. Bələdiyyələr bərabərlik əsasında qurulur və fəaliyyət göstərirlər.

Qeyd edək ki, MSK üzvləri tərəfindən yekdilliklə qəbul edilən qərara görə, dekabrın 23-də ölkə ərazisində bələdiyyə seçkiləri keçiriləcək.

Mövzunu davam etdirəcəyik.

Fatimə İbrahimova
Ölkə.az