Azərbaycanlı gənclər İŞİD-ı analiz etdilər

25 oktyabr 2014-cü il tarixində Azərbaycan Respublikasının Prezidenti yanında Gənclər Fondunun maliyyə dəstəyi ilə həyata keçirilən “Araşdırma GƏNCləşir” layihəsinin imtahan mərhələsi baş tutub.

İmtahanın məqsədi layihə çərçivəsində nəzərdə tutulmuş tədqiqat işlərinin yazılması mərhələsində iştirak etmək üçün 15 gəncin seçilməsidir. Layihə rəhbəri, Azərbaycan Respublikası Prezidenti yanında Dövlət İdarəçilik Akademiyasının 3-cü kurs tələbəsi Güllü Eldarzadə qeyd edib ki, imtahan zamanı iştirakçılar “Niyə mən?” və “İŞİD-in analizi” sualları üzrə öz fikirlərini yazılı şəkildə ifadə etməyə çalışıblar:

“Bildiyimiz kimi, hal-hazırda gənclərimiz arasında ən böyük problemlərdən biri fikirləri məhz yazılışəkildə ifadə etməkdir. İmtahan da bu məqsədlə test və ya şifahi üsulla deyil, yazılı qaydada aparılıb”, - deyə layihə eəhbəri əlavə edib.

Qeyd edək ki, imtahanın nəticələri məlum olduqdan sonra uğurla keçmiş gənclər beynəlxalq münasibətlərdə münaqişə və problemlərin araşdırılması üçün müxtəlif mövzularda tədqiqat işlərinin yazılmasına başlayacaqlar. Hazırlıq prosesi zamanı iştirakçılarla sıx şəkildə əlaqə yaradılaraq araşdırma işində peşəkarlar tərəfindən köməklik göstəriləcək.

Xatırladaq ki, layihə Azərbaycan gəncliyinin dünyaya inteqrasiya və qloballaşma dövründə beynəlxalq münasibətlərdə baş verən hadisə və prosesləri dərindən araşdırmasına xidmət edir .

Ölkə.Az