Ambulator müalicə dərmanlarını vətəndaş alacaq
Xəstəxanada müalicə olunanların dərmanlarını sığorta şirkəti ödəyəcək, evdə müalicə olunanlar isə dərmanlarını öz pullarına almalı olacaqlar.
Ölkə.Az Xəzərxəbər-ə istinadən xəbər verir ki, bu hökumətə təqdim olunan icbari tibbi sığorta zərfində öz əksini tapıb. Təkliflərdə hansı xidmətlərin sığorta şirkəti hesabına həyata keçirilməsi də əks olunub.
Ambulator, yəni ev şəraitində müalicə olunacaq şəxslərin dərman təminatı İcbari Tibbi Sığorta zərfinə daxil edilməyib. Bu, Nazirlər Kabineti yanında İcbari Tibbi Sığorta üzrə Agentliyin hökumətə təqdim etdiyi təkliflərdə belədir.
Ancaq bir çox ölkədə ambulator müalicə üçün dərmanlar da sığorta paketinə əlavə olunur. Bununla bağlı İcbari Tibbi Sığorta üzrə Agentliyin xüsusi təklifləri də var.
Nazirlər Kabinetinə göndərilən təkliflərdə icbari tibbi sığorta zərfinə daxil edilmiş xidmətlər yer alıb.
Bir nəfər üçün illik icbari tibbi sığorta məbləği 100 manat həcmində müəyyən edilib. Bu o deməkdir ki, Azərbaycanda vətəndaşların hamısının sığortalanması baş verərsə, təxminən 1 milyard manata yaxın icbari tibbi sığorta vəsaiti toplanacaq. Ekspertlər düşünür ki, bu məbləğ o qədər böyük olmadığından dərman təminatı və bəzi tibbi xidmətlər icbari tibbi sığorta paketinə daxil edilməyib.
