Gəncədəki universitetlərdə “1inci klub”un təqdimatı keçirilib
"Gəncə - 2016 Avropa Gənclər Paytaxtı" layihəsi çərçivəsində Gənclər üçün Təhsil Mərkəzinin Gəncə Regional ofisi Gəncə şəhər İcra Hakimiyyətinin dəstəyi ilə təhsilə dəstək kampaniyası olaraq gəncləri, əsasən də tələbələri hədəf götürən “1inci club” layihəsinin növbəti təqdimat mərasimlərini keçirib.
Ölkə.Az xəbər verir ki, Gəncə Dövlət Universiteti, Azərbaycan Dövlət Aqrar Universiteti, Azərbaycan Texnologiya Universiteti və Gəncə Tibb Kollecində baş tutan təqdimat mərasimlərində tələbələrə “1inci club” layihəsinin məqsədi və görüləcək işlər barədə məlumat verilib.
Təqdimatlarda Gənclər üçün Təhsil Mərkəzinin Regional ofisinin rəhbəri Aygün Həsənzadə dövlətimiz tərəfindən ölkəmizdə gənclərin inkişafı naminə yaradılan imkan və şəraitdən danışıb. Bildirib ki, layihənin məqsədi gənclərin asudə vaxtlarından maksimum istifadə etmələrinə şərait yaratmaqla, onlarda intellektual və peşəkar bacarıqların artırılması, sağlam həyat tərzi və sağlam düşüncə aşılayaraq, onlarda sağlam vətəndaş mövqeyi formalaşdırmaqdır.
Layihənin rəhbəri Ənvər Yavəroğlu da tələbələrə layihənin əhəmiyyəti və klubun kartı barədə geniş məlumat verib.
Tələbələr onları maraqlandıran suallar ətrafında ekspertlərlə fikir mübadiləsi aparıblar.
Qeyd edək ki, layihənin 10-dan artıq tərəfdaşı var.
