FAO-Azərbaycan Tərəfdaşlıq Proqramının fəaliyyətə başlamasına həsr olunmuş seminar keçirilmişdir
22 noyabr tarixində “Hilton” mehmanxanasında BMT-nin Ərzaq və Kənd Təsərrüfatı Təşkilatının (FAO) Azərbaycandakı Tərəfdaşlıq və Əlaqələndirmə Ofisinin və Kənd Təsərrüfatı Nazirliyinin birgə təşkilatçılığı ilə FAO-Azərbaycan Tərəfdaşlıq Proqramının (FATP) fəaliyyətə başlamasına həsr olunmuş seminar və FATP-ın Rəhbər Komitəsinin ilk iclası keçirilmişdir.
Tədbirdə Kənd Təsərrüfatı, Ekologiya və Təbii Sərvətlər, Xarici İşlər və İqtisadiyyat Nazirliklərinin, FAO-nun Azərbaycandakı, eləcə də Avropa və Mərkəzi Asiya üzrə alt-regional Ofislərinin nümayəndələri iştirak etmişlər.
Tədbiri giriş sözü ilə açan Azərbaycan Respublikası kənd təsərrüfatı nazirinin müavini İlham Quliyev qonaqları salamlayaraq, dövlət başçısı İlham Əliyevin rəhbərliyi altında aparılan məqsədyönlü siyasət nəticəsində Azərbaycanın kənd təsərrüfatı sektorunun son illərdə əldə etdiyi nailiyyətlər barədə tədbir iştirakçılarına geniş məlumat vermiş və ölkəmiz ilə FAO arasında yüksələn xətlə inkişaf edən əlaqələrdən məmnunluğunu ifadə etmişdir. “Aqrar sahənin inkişafı ilə əlaqədar dövlət siyasətinin əsas istiqamətləri ərzaq məhsulları üzrə idxaldan asılılığı azaltmaq, ərzaq təhlükəsizliyini gücləndirmək və ixrac potensialını artırmaqla ölkəni əsas ixracatçı ölkələr sırasına gətirməkdir”- deyə, bildirən nazir müavini, bu baxımdan FAO-nun rolunu xüsusilə vurğulamışdır.
FAO-nun Azərbaycandakı Tərəfdaşlıq və Əlaqələndirmə Ofisinin rəhbəri Melek Çakmak öz çıxışında, FAO-nun fəaliyyətlərinin ölkədə həyata keçirilməsi istiqamətində hökumətin göstərdiyi mütəmadi dəstəyə görə təşəkkürünü bildirmiş və qeyd etmişdir ki, FAO-nun bir sıra regional və beynəlxalq tədbirlərində Azərbaycanda görülən işlər nümunə kimi digər ölkələrə təqdim olunur və ölkə təcrübəsi diqqətlə izlənilir. Bu baxımdan, layihələrin icrasına nəzarət olunmasına və gələcək fəaliyyətlərin planlaşdırılmasına FATP çərçivəsində təsis olunmuş Rəhbər Komitənin böyük töhfə verəcəyini bildirmişdir.
Bundan sonra, FAO-nun beynəlxalq ekspertləri tərəfindən FAO-nun strateji məqsədləri və əməkdaşlıq vasitələri, Mərkəzi Asiyada kənd təsərrüfatının inkişafı, FATP-ın prioritetləri və Əməliyyat Çərçivəsi haqqında təqdimatlar edilmiş və iştirakçıların sualları məruzəçilər tərəfindən cavablandırılmışdır.
Tədbirin ikinci hissəsində Rəhbət Komitənin ilk iclası keçirilmiş, üzvlərin və müşahidəçilərin iştirakı ilə FATP-ın Əməliyyat Çərçivəsi sənədinin layihəsinə dair geniş fikir mübadiləsi aparılmış və konsensus əsasında təsdiq edilmişdir.
Bununla da, tədbir öz işini yekunlaşdırmışdır.
FAO-Azərbaycan Tərəfdaşlıq Proqramı və Rəhbər Komitə
Ötən ilin 25 may tarixində FAO-nun baş direktoru Joze Qratsiano da Silvanın ölkəmizə səfəri çərçivəsində “Azərbaycan Respublikası Hökuməti ilə Birləşmiş Millətlər Təşkilatının Ərzaq və Kənd Təsərrüfatı Təşkilatı arasında FAO-Azərbaycan Tərəfdaşlıq Proqramı haqqında” Saziş imzalanmış və Azərbaycan Respublikasının 2015-ci il 30 sentyabr tarixli 1315-IVQ nömrəli Qanunu ilə təsdiq edilmişdir. Tərəfdaşlıq Proqramı, Azərbaycan Respublikasında Minilliyin İnkişaf Məqsədlərinə nail olunması istiqamətində Tərəflərin qarşılıqlı əlaqəsini və birgə fəaliyyətini gücləndirməyə yönəlmişdir. Tərəfdaşlıq Proqramı çərçivəsində Azərbaycan Respublikasının aidiyyəti dövlət qurumlarının və FAO-nun nümayəndələrindən təşkil olunmuş birgə Rəhbər Komitə, FAO xətti ilə ölkəmizdə həyata keçirilən proqram və layihələrin illik icra vəziyyətini və nəticələrini qiymətləndirəcək, Komitə üzvləri arasında qarşılıqlı əlaqəni təmin edəcək, o cümlədən ümumi tematik və proqram yanaşmasının yerinə yetirilməsinə töhfə verəcəkdir. Eyni zamanda, əldə olunmuş razılığa əsasən, mütəmadi qaydada məlumat mübadiləsinin aparılması üçün FAO və Kənd Təsərrüfatı Nazirliyi ən azı ildə bir dəfə Rəhbər Komitənin iclasını keçirəcəklər.
