Ziyad Səmədzadə: “Azərbaycan bu təsirlərin qarşısını kifayət qədər ala bilib”

“Son illər dünyada neftin qiymətinin aşağı düşməsi neft istehsalı yüksək olan ölkələrdə, o cümlədən Azərbaycanda büdcə azalmasına səbəb olub”.

Ölkə.Az-ın məlumatına görə, bunu Milli Məclisin İqtisadi siyasət, sənaye və sahibkarlıq komitəsinin bu gün keçirilən iclasında büdcə zərfinin müzakirələri zamanı komitə sədri Ziyad Səmədzadə bildirib.

Komitə sədri deyib ki, Azərbaycan da bu cür təsirlərə məruz qalan ölkələrdən biridir:

“Ancaq uzun illər düşünülən siyasət dünyada gedən iqtisadi böhranın ölkəmizə təsirinin minimuma endirilməsinə imkan yaradıb. Azərbaycan Prezidentinin və hökumətinin apardığı məqsədyönlü siyasət bu təsirlərin qarşısını kifayət qədər ala bilib. Neftin dünya bazarında ucuzlaşması ölkəmizdə də büdcə gəlirlərinin azalmasına təsir edib. Bu səbəbdən də ölkəmizdə aparılan iqtisadi islahatların dərinləşməsi ön plana çəkilib. Prezident İlham Əliyevin tapşırığına əsasən, Azərbaycanda iqtisadi islahatlarla bağlı mühüm addımlar atılır”.

Z.Səmədzadə qeyd edib ki, 2017-ci il üzrə dövlət büdcə zərfi Milli Məclisə gec daxil olub:

“Obyektiv səbəblərə görə bu il büdcə zərfi Milli Məclisə gec daxil oldu. Lakin bütövlükdə Milli Məclisə daxil olan büdcə zərfinə aid olan sənədlər Azərbaycanın gələcəyi üçün güclü ehtiyatları nəzərdə tutur”.

Zaur Əziz
Ölkə.Az