Korporotiv Sosial Məsuliyyətlə (KSM-lə) bağlı“Dəyirmi Masa” təşkil olunub
Azərbaycan Respublikasının Prezidenti yanında Qeyri-Hökumət Təşkilatlarına Dövlət Dəstəyi Şurasının maliyyə dəstəyi və Azərbaycan Sahibkarlar Konfederasiyasının təşkilatı dəstəyi ilə “Gənc Mühasiblər İctimai Birliyi”nin icra etdiyi "QHT-Biznes əlaqələrinin gücləndirilməsi" adlı layihə çərçivəsində Korporativ Sosial Məsuliyyət mövzusunda Bakı şəhəri “Hyatt Regency” otelində dövlət rəsmilərinin, sahibkarların, qeyri hökumət təşkilatlarının və media nümayəndələrinin iştirakı ilə dəyirmi masa təşkil olunmuşdur.
Tədbiri giriş sözü ilə Gənc Mühasiblər İctimai Birliyinin sədri Solmaz Əliyeva açaraq bildirdi ki, layihənin məqsədi Azərbaycanda olan şirkətlərin həyata keçirdiyi uğurlu KSM layihələri haqqında ictimai məlumatlandırmanı, təcrübə mübadiləsini həyata keçirmək, KSM fəaliyyəti ilə məşğul olan sahibkarlarlıq subyektləri üçün müvafiq güzəştlərin tətbiq olunmasının müzakirə təşəbbüsü, QHT- Biznes əməkdaşlığının möhkəmləndirilməsinə kömək etməkdir. O qeyd etdi ki, sahibkarların bu sahədə fəaliyyətini stimullaşdırmaq üçün KSM-lə məşğul olan özəl şirkətlərin Nümunəvi Vergi Ödəyicisi siyahısına salınması təklifi ilə Vergilər Nazirliyinə müvafiq təşəbbüslə müraciət etmək məqsədəuyğun olar.
Azərbaycan Respublikasının Prezidenti Administrasiyasının İctimai Siyasi Məsələlər şöbəsinin Gənclər Təşkilatları ilə iş sektorunun müdiri Vüsal Quliyev isə çıxışında bildirdi ki, KSM mövzusu çox aktual mövzudur və Azərbaycan dövləti daim QHT-lərin, özəl sektorun inkişafı sahəsində müxtəlif tədbirlər həyata keçirmiş, onlar arasında əməkdaşlığın formalaşmasında maraqlı olaraq müxtəlif layihələri maliyyələşdirmişdir. KSM ilə bağlı müvafiq sənədlərin hazırlanması işi ilə bağlı Azərbaycan Respublikasının Prezidenti yanında Qeyri-Hökumət Təşkilatlarına Dövlət Dəstəyi Şurası təşəbbüs də göstərmişdir. Mövzu aktuallığını saxlayır və bu istiqamətdə fəaliyyəti davam etdirmək lazımdır. Bu sahədə dövlət tərəfindən nə asılıdırsa, bu təşəbbüslərin nəzərdən keçirilməsinə dövlət hazırdır. Eyni zamanda, biznes strukturlarının bu sahədə rolunun artırılmasına ehtiyac vardır.
Azərbaycan Respublikasının Prezidenti yanında Qeyri-Hökumət Təşkilatlarına Dövlət Dəstəyi Şurasının Katibliyinin icraçı direktoru Fərasət Qurbanov çıxışnda qeyd etdi ki, ilk növbədə QHT-ləri özəl sektorla əməkdaşlığa hazırlamaq lazımdır. O həmçinin, Dövlət Şurası ilə yanaşı, özəl qurumların da, milli donor qismində rolunun artırılmasına ehtiyac olduğunu bildirdi. Bununla bağlı təklif irəli sürən icraçı direktor qeyd etdi ki, yaxşı olar ki, biznes qurumlar ilk əməkdaşlığın başlanğıcı kimi müəyyən bir müsabiqə elan etsinlər. Son qərarı özəl qurumlar özləri verməklə Şura bu müsabiqəyə texniki dəstəyin verilməsinə hazırdır.
Beynəlxalq Münasibətlərin Araşdırılmasi Mərkəzi İctimai Birliyinin sədri, Azərbaycan Respublikasının Prezidenti yanında Qeyri-Hökumət Təşkilatlarına Dövlət Dəstəyi Şurasının müşahidə şurasının üzvü Rufiz Qonaqov bu mövzuda tədbirin keçirilməsini alqışlayaraq bildirdi ki, həqiqətən də QHT-lərlə biznes strukturlarının əməkdaşlığa çox böyük ehtiyac vardır. Belə tədbirlərin tez tez keçirilməsi bu əməkdaşlığın inkişaf etdirilməsinə xidmət edəcəkdir.
Azərbaycan Sahibkarlar Konfederasiyasının vitse prezidenti Vüqar Zeynalov KSM anlayışının cəmiyyət üçün yeni olduğunu bildirərək qeyd etdi ki, biznes strukturunun öz məsuliyyəti kifayət qədərdir, dövlət büdcəsinə vergi verir, insanlara sosial yardımlar edir, əişçilər saxlayır. Onların KSM –lə bağlı fəaliyyətdə maraqlandırmaq, stimullaşdırmaq lazımdır. Burada özəl qurumların öz maraqları da nəzərə alınmalı və təşviq olunmalıdır.
Daha sonra dövlət orqanlarından Azərbaycan Respublikası Vergilər Nazirliyinin nümayəndəsi Həsənov Faiq, Azərbaycan Respublikası İqtisadiyyat Nazirliyinin nümayəndəsi Nicat Eyvazzadə, beynəlxalq təşkilatlardan USAİD təşkilatıının ölkə üzrə direktoru Pərviz Musayev, “SEDA” proqramının direktor müavini Vaqif Həsənov, Alman-Azərbaycan Xarici Ticarət Palatasının nümayəndəsi Kristina Məmmədova, milli Qeyri Hökumət Təşkilatlarından Ümid Sosial İnkişafa Dəstək İctimai Birliyinin sədri İsrayıl İskəndərov, Sahibkar Qadınlar İctimai Birliyinin sədri Zemfira Ağayeva, QHT-lər üzrə ekspert Şahin Rəcəb, özəl sektorun nümayəndələrindən “AZƏRSUN HOLDİNQ” PR meneceri Afiq Səfərov, “Synergy Sport”un baş direktoru Əhəd Kazımov, “Azerfon MMC”-nin nümayəndəsi Əziz Axundov, Bakı Tekstil”in direktoru Səkinə Babayeva, “ACCESS Bank”ın nümayəndəsi Könül Babayeva, “Turan Bank”ın nümayəndəsi Kəmalə Mustafayeva, Azərbaycan Dövlət İqtisad Universitetinin müəllimi, marketoloq, Oqtay Quliyev, “qhtxeber.az” saytının baş redaktoru Sənan Nəcəfov və digərləri çıxış edərək tədbirin əhəmiyyətini vurğulamış və maraqlı təkliflərlə çıxış etmişlər.
İştirakçılar yekdilliklə Qeyri Hökumət Təşkilatları ilə biznes strukturları arasındakı münasibətlərin şəfaffaf, qarşılıqlı, faydalı əməkdaşlıq çərçivəsində qurulması üçün müxtəlif addımların atılmasının vacibliyini qeyd etdilər.
