Son 25 ilin Yaddaşı ANS ilə təzələnir

 

Ölkə.Az xəbər verir ki, tədbirdə ölkənin tanınmış ictimai-siyasi xadimləri, millət vəkilləri, politoloqlar, Amerika Birləşmiş Ştatlarının ölkəmizdəki səfirliyinin nümayəndəsi, xalq artistləri, aktyorlar iştirak edib.

 

Tədbir iştirakçıları xalqımızın keçdiyi müstəqillik yoluna bir daha şahidlik ediblər. Belə ki, ANS-in Qızıl fondunun o illəri əks etdirən unudulmaz nümunələri yenidən nümayiş olunub.

 

Tədbirin açılışında Azərbaycanın dövlət himni səsləndirilib, vətən uğrunda canlarından keçən şəhidlərimizin ruhu bir dəqiqəlik sükutla yad edildi.

 

Daha sonra “Yaddaş axşamı”nda millət vəkilləri Elmira Axundova, Aqil Abbas, Fazil Mustafa, Fəzail Ağamalı, Rasim Musabəyov, tanınmış siyasətçilər Etibar Məmmədov, tarixçi professor Hacıbaba Əzimov, əməkdar jurnalist Mais Məmmədov, xalq artisti Flora Kərimova, milli azadlıq hərəkatının liderlərindən biri Nemət Pənahlı və başqa tanınmış şəxslər çıxış edərək Azərbaycanın müstəqillik tarixinin ən xırda təfərrüatlarından söhbət açıblar.

 

1990-cı illərdə milli azadlıq hərəkatının liderlərindən biri, xalq şairi Sabir Rüstəmxanlı çıxışı zamanı qeyd edib ki, Azərbaycan 25 illik müstəqillik dövründə çox nailliyyətlər əldə etsə də itirdikləri də çox olub.

 

ANS Şirkətlər qrupunun vitse-prezidenti Seyfulla Mustafayev isə Azərbaycan xalqının müstəqillik müqavimətinin tarix boyu davam etdiyini, heç vaxt dayanmadığını bildirib.

 

Onun sözlərinə görə, SSRİ dönəmində də müstəqillik müqaviməti müxtəlif forma və şəkillərdə aparılırdı.

 

Milli Azadlıq Hərəkatının liderindən biri Etibar Məmmədov da tədbirdə çıxış edib. O bildirib ki, xalq 1990-cı illərdə baş verən bütün hadisələri ANS-in kamerasından gördüyü üçün Azərbaycanın müstəqilliyi ilə ANS-in 25 illiyi birlikdə qeyd olunmalıdır.

 

Daha sonra söz ANS Şirkətlər Qrupunun rəhbəri Vahid Mustafayevə verildi. O, Azərbaycanın müstəqillik yolunda medianın rolu barədə danışıb.

 

“O dövrdə meydanlarda baş verənləri xalqa çatdırmaq mühüm məsələ idi. ANS-in yaranmağının əsas məqsədlərindən biri ölkədə baş verənləri dünyaya çatdırmaq idi. Çətin dövrlər idi. Çünki blokada vəziyyətində idik. Heydər Əliyevin xalq üçün gördüyü işləri, Naxçıvan Muxtar Respublikasının parlamentində Azərbaycan bayrağının dalğalandırılmasını biz jurnalistlər bütöv Azərbaycana çatdıra bildik”, - V.Mustafayev deyə bildirib.

 

Millət vəkili Elmira Axundova isə fəaliyyətinə jurnalistikadan başladığını, müstəqillik yolunda baş verən hadisələri işıqlandırmağa çalışdığını, eyni zamanda ANS-in Azərbaycanın müstəqilliyi uğrunda gedən bütün prosesləri lentə alaraq xalqa obyektiv şəkildə çatdırdığını deyib.