Balakən Rayon İcra Hakimiyyəti: "Yayılan məlumatlar qərəzlidir"

Balakənin Cederovtala kəndində fəaliyyət göstərən bələdiyyənin saxtakarlığa yol verməsi barədə yayılan məlumatlara Baləkən Rayon İcra Hakimiyyətindən cavab gəlib.

Ölkə.az-a danışan Baləkən Rayon İcra Hakimiyyətinin şöbə müdiri İbrahimov Nurullah yayılan məlumatların qərəzli olduğunu və heç bir həqiqətə uyğun olmadığını deyib. O, bildirib ki, "keçmiş bələdiyyə sədri çoxdan işdən çıxıb, həbs də olunub. İndi onun adamları özlərini təmizə çıxarmaq üçün bu cür məlumatlar yayırlar".

Bələdiyyənin otağı da bir balaca otaq olub, onu elə də rəsmiləşdirmək düzgün deyil. Onu da o bələdiyyənin borclarına görə satıblar. Satıblar dedikdə heç ora elə qiymətli də deyil. Bizdə kəndlərdə bələdiyyələrin mülkiyyətində sanballı binalar, və yaxud ərazilər yoxdur. Özü də ora kiçik bələdiyyə idi, hazırda isə digər qonşu bələdiyyə ilə birləşdirilib, qısacası indi həmin bələdiyyə heç mövcud da deyil.

Gəlib, görsəniz məlumatın əsassız olduğunu görəcəksiniz. 5-6 insan var ki, hər zaman şikayət, hay-küy salmağa meyllidir. Qəbiristanlıq heç böyük qəbiristanlıq da deyil. Mən obyektiv danışıram. İstəsəniz faktı yerində yoxlaya bilərsiniz. Ümumilikdə qəbiristanlığın satılması hansı məntiqə uyğundur? Qəbiristanlıq torpağının yanındakı ərazi satıla bilər, hansı ki, o ərazi bələdiyyənin mülkiyyətindədir. Yoxsa heç vaxt qəbiristanlıq ərazisi satıla bilməz, çünki biz tərəf həm də inanclı adamlardır. Belə şey heç vaxt ola bilməz".

Xatırladaq ki, yayılan məlumatlarda Balakəndə seçki məntəqəsinin 5 min manata satıldığı, həmçinin Cederovtala kəndinə aid qəbiristanlığın 40 sot ərazinin başqa kəndlərin sakinlərinə satıldığı iddia edilirdi.

Fatimə İbrahimova
Ölkə.az